Ҳодисаҳои психологӣ ҳамчун маромҳои фаъолияти шахс гуногунанд ва ташаккули чунин маромҳо ба монанди шавқу ҳавасҳои васеъ ва амиқ, ҳисси масъулият, вазифашиносӣ, амри виҷдон дар одамон зарур аст.
Маромҳои ахлоқии рафтор ва фаъолият ҳамеша дар идеалҳои ахлоқие ифода меёбанд, ки ҳамчун намунаҳо барои тақлид намудан хизмат мекунанд.
Равияи шахс монанди дигар хусусиятҳои индивидуалии дар боло зикршуда (қобилият, характер, мизоҷ) дар фаъолият зоҳир мешавад ва ташаккул меёбад.
Шахс – ин ташкилаи таркибан томи психикӣ мебошад, ки моҳияти иҷтимоии одами реалиро ҳамчун субъекти бошуури маърифат ва дигаргунсозии фаъоли олам инъикос мекунад. Ибтидои ташаккули шахс ба синни кӯдакӣ рост меояд, вале ба камолрасии ҳақиқӣ ҳангоми пурра ба муошират бо коллектив ва ҳаёти ҷамъиятӣ даромадани одам, яъне аз синни навҷавонӣ (аз 16-солагӣ) сар мешавад. Дар хусусиятҳои шахсияти одам, чун дар оина, ҳамаи сифатҳои индивидуалии ба ӯ хос инъикос меёбанд.
Рушду камоли шахс дар охири синни ҷавонӣ ва ибтидои синни камолот (20-22-солагӣ) ба вуҷуд меояд, вале такмили он минбаъд ҳам давом мекунад.
Шахс зери таъсири муҳити иҷтимоӣ ташаккулу инкишоф меёбад ва маҳсули он низ ба шумор меравад. Шахс ҳамчун одами зиндаи конкретӣ дорои шуур ва худшиносӣ мебошад. Шуури шахси алоҳида ҳамеша табиати ҷамъиятӣ-таърихиро дорад ва он ба манфиату мақсадҳо ва сиёсати ҳамон ҷамъият, синф ё гурӯҳе вобаста аст, ки одам мутааллиқи он аст. Худшиносӣ ҳамчун дараҷаи олии тараққиёти шуури одам асоси ташаккули фаъолнокӣ ва мустақилии шахсро дар фикру амалҳо ташкил медиҳад.