Гурехтанд, имкони ҷанг наёфта, ё сари ҷанг надошта; саворону аспони бесавор фирор карданд. Аспони аскарони қўрбошӣ низ ҳамроҳи онҳо буд; гурехтанд ба сони галаи рамида. Ёрмуҳаммад андеша дошт, ки ҳарфҳояш ногуфта монд, мадда дар дил дорад; оё боз ба дидор расанд ё на. Ў сари аспон гардонда, сўйи Панҷакат рафтанӣ буд, аммо ноогоҳ, ки аскарони Ҳомид миёнбур аз боғот баромада, пеши роҳашонро гиранд ва кор безеб шавад...
ҷониби Боғи Гарон рафт, ки тори қабристонро гузарад, рўҳу арвоҳ ёвар гарданд... Ў гумон накарда, ки ба чунин зудӣ дунбола гиранд ва дар гўристон безобита кунанд. Ақлаш нагирифта буд, ки дастаи Ҳомид боз ин қадар асп дорад, таъқиб кунад онҳоро ва тир занад...
Ҳомид-қўрбошӣ, ки ҳам аспи худ ва ҳам аспони беҳтаринро дар саисхонаву тавилаи қозиву муфтӣ, дар ҳавлии даруни амини камақл ҷой карда буд, савор шуданд ва бар асари дастаи Ёрмуҳаммад тохтанд.
Дастаи Ёрмуҳаммад дар Боғи Гарон ҷой нагирифта расида омаданд онҳо ва тирпарронӣ карданд аз камонҳои англисӣ. Дастаи хурди Ёрмуҳаммад ба танг омада фирор кард ва сари баргашта муқобилат кардан надошт. Як ҳукм меомад дастаи Ҳомид-қўрбошӣ. Ҷилави аспони бесаворро раҳо карда пеши дастаи қўрбошӣ гузоштанд, ки шояд шод гардад. Ба ишораи қўрбошӣ саворе аспонро пас гардонду ронд, то соҳибони пиёдагашта савор шуда онҳоро дарёбанд.
Бероҳа шуд дастаи Ёрмуҳаммад. Пушти Боғи Гарон гашт ва ҷониби Дашти Маҳрў рў овард, раҳо ёфтанӣ буд...
...ва аз қазо буд ё нишони дақиқ, нарасида ба Дашти Маҳрў ба аспи Ёрмуҳаммад тир расид, пои росташ кашола шуд ва сепоя саворашро ба ҷое расондан хост, натавонист. Бозистод... Сўйи савор гардан тофт. Чашмони барҷастааш Ёрмуҳаммадро дар худ таҷассум карда буданд. Саворони дигар аз ў пеш гузаштанд. Яке дониста, дигаре ҷангнадида дар паси зинҳо парчин гашта буданд аз бими тир ва ў худро аз асп партофт, пеш тохт, то ба Зарафшон расад, фурў равад ба коми рўд, ки волотар аз он аст, ки душман кушад...
...вале натавонист. Афтид ба даст. Ў гумон карда буд, ки Ҳомид-қўрбошӣ баробари даст гирифтан ба сари синааш тир занад ва ё мағзи сарашро барорад... ва ё хандаи баланди тамасхуромсз барорад ва ў тоқат накарда қўрбоширо дашном диҳад, бо қаҳру ғазаб кушанд ўро. Чунин нашуд. Дар хирманҷои Дашти Маҳрў, поёнтар аз хонаи Сафед, ки фиристодаҳои ҳукумати подшоҳӣ сохта буданд ва касе намедонист, ки хонаи бекас чӣ вазифаро адо кунад, дастгираш карданд. Ҳомид-қўрбошӣ ором, ботамкин буд ва асрор ҳувайдо намекард, гўё коре нашуда ва ҷонибаш касе тир наандохта...