Дўстон ва шогирдонатон шуморо хоҳанд дид, медонед ҳамин расм ба шумо чӣ қадар шӯҳрат меорад?

• Ман омадаам, ки...
• Пасфардо рўзнома чоп мешавад ва расми шумо мебарояд, аз ин зиёдтар мо имконият надорем.
• Ман омадаам, ки аз шумо хоҳиш намоям он расмро чоп накунед!
• Ин ғайриимкон аст.
• Чаро?
• Мисли он ки шумо мехоҳед, ки хонандагонатон босавод бошанд, мо ҳам обрўйи рўзномаамонро хоҳонем ва ман наметавонам чунин як маводи зеборо ба чоп надиҳам.
• Оё намешавад, ки маводро бе расм чоп намоед?
• Бе расм ҳам мешавад, вале бо расм беҳтар.
• Илтимос сухани бандаро рад накунед.
• Дигарон омада хоҳишу илтиҷо менамоянд, ки ягон илоҷ намуда расмашонро дар рўзнома ҷой диҳем, вале шумо бошед баръакс хоҳиш доред, ки аксатон рўйи чоп наояд.
• Илтимос, акаҷон, ба ман ёрӣ диҳед.
• Ман розӣ, ба шарте ки шумо сабаби ба чунин амал даст задаатонро кушоду равшан шарҳ диҳед.
• Чӣ гўям?
• Гўед, ки чаро шумо намехоҳед, расматон чоп шавад?
• Ман метарсам.
• Аз кӣ?
• Аз падарам.
• Баръакс, падаратон аз дидани расматон хурсанд мешавад.
• Шумо ҳоло падари маро намедонед, агар расми маро бубинад, ба сари модарам чормағз хоҳад шикаст. Охир ман бо тавсияи модарам ба донишгоҳ омадам. Ба ҳоли модари ман раҳм намоед.
• Наход падари шумо ин қадар хурофотпараст бошад?
• Он кас дар ҳақиқат хурофотпарастанд.