• Пас ин ҳама нигарониатонро сабаб чист?
• То ҷое мо иттилоъ гирифтем, дар сафари моҳи сентябр ба Бишкек Сафо Боқӣ ду борони чармини сиёҳ оварда будааст.
• Мо гуфта киро дар назар доред?
• Милисаро.
• Агар банда кулоҳ медоштам, онро ба хотири корнамоиҳои шумо зери қудуматон нисор мекардам.
• Хоҳиш мекунам бандаро бардор – бардор накунед.
• Уклонение от похвалы – это просьба повторить её,59- бо як ҷиддияти том гуфт Нӯшин.
• Наход шумо гумон намоед…
• Ин ҳолатро таҷрибаи зиндагӣ собит намудааст ва хоҳиш мекунам дар ин бора баҳс накунед.
• Чӣ илоҷ.
• Ман ҳеҷ нафаҳмидам, ки он ду боронӣ насиби кӣ гаштааст?
• Аз рўи иттилои мо яктои он борониҳо насиби ҳамсари қонунии вай ва дигараш насиби дугонаи ҳамсари қонуниаш.
• Насиби Малика чӣ?
• Ба ин савол танҳо Малика ҷавоб дода метавонад.
• Шумо дидед, ки хонаи ба номи Малика харидаи ў чӣ нарх дошт?
• Ба фикрам дусаду панҷоҳ ҳазор доллар.
• Дар асл шояд он хонаро нархи бештарест.
• Баҳс намекунам.
• Модоме ки Сафо Боқӣ чунин маблағро нисори қудуми бонуи дуюми хеш намудааст, пас чӣ мушкилие дорад туҳфа намудани як боронӣ.
• Ба ҳар ҳол ба ин савол ҳарчӣ тезтар ҷавоб гирифтан лозим..
• Магар касе садди роҳи шумо шудааст?
• Не, албатта.
• Пас чӣ ҷои таассуф?
• Инаш рост. Чун Абдурашидро баҳри овардани расм фиристам, хоҳиш мекунам посухи ин суолро ҳам биёрад.
• Гуфтед, ки як боронии овардаи Сафо насиби ҳамсари қонуниаш гардида.
• Аз рўи хабари гирифтаи мо чунин аст.
• Пас чаро ўро ҷеғ зада напурсидед?

Саркашӣ аз шунидани таъриф – ин хоҳиши такрори он аст.