Асарҳои мунтахаб ҷилди 8
- Малика ҳамон нафарест, ки банда дар вохӯрии гузашта дар борааш ба шумо ҳикоят намуда будам.
- Чӣ?
-Он чӣ шунидед, Малика ҳамон духтарест, ки аз телефонавтомати қариб бесоҳибмондаи кӯчаи «Озоди занон» ба ман занг зада гуфта буд, ки: «Сафо Боқӣ нияти аз ҳамсараш ҷудо шудан дошт». Ё гапам нодуруст. - Дуруст.
-Пас чаро шумо ҳаминро аввал нагуфтед? - Чунки шумо ба ман чунин имконият надодед.
- Маро бубахшед, ман худам ба эҳсосот дода шуда, аз шунидани каломи ҳақ дур мондам.
- Беҳуда худро мазаммат накунед. Дар асл ман гунаҳгорам, чунки матлаби хешро дуруст баён накардам. Ҳамин лаҳза як латифае ба ёдам омад.
- Шуниданаш мумкин?
- Чаро не? Мардеро ба ҷурми кадом як гуноҳе дастгир намуда, ба назди қозӣ бурданд.
- Номи шумо, - пурсидааст қозӣ.
- Худо …
- Занед ўро, мо ки яктопарастем, чаро ў даъвои худоӣ дорад?
Мардро хеле латӯкуб намуданд, то дигар даъвои беҳуда накунад.
-Номат чист? - баъди он ҳама шиканҷаҳо пурсидааст қозӣ.
-Ҳамоне, ки гуфтам ва дар иловааш Бердӣ. - Худоибердӣ? - пурсидааст қозӣ.
- Бале, тақсир.
- Пас чаро ҳамин калимаро барвақттар нагуфтӣ…
- Худо худаш шоҳид, ки шумо барои гуфтор ба ман имконият надодед…»
- Яку сифр ба фоидаи шумо,-гуфт Нӯшин ва аз ҷой бархоста назди тиреза рафт.
Чун дафтари кори муфаттиш дар ошёнаи якуми бинои прокуратура ҷойгир буду аз тирезааш дари баромадгоҳ намоён, ман ба хулосае омадам, ў чашм дар роҳи «қаҳрамони»
асосиест, ки рафтораш боиси ҳамдигарнофаҳмии мо гашта… - Ба фикрам, ана омад, - тахминан баъди панҷ дақиқаи интизории пушти тиреза овоз рӯшан намуд муфаттиш.
- Ў танҳост?
- Танҳо.
Барномасозӣ
Олами Афсонаҳо
Ахбор