БОБИ ХХХ

ПОЧТАИ ҲАВОӢ

Луиза Пойндекстер бо он намудҳои спорт, ки онҳоро мардона шумурдан расм шудааст, машғул гардида, албатта, беэътиноӣ накарда, аз камон ҳам тир мепарронд. Ӯ ин санъатро мукаммал аз худ карда буд.

Камонандозиро вай аз ҳиндуҳои қабилаи юма ёд гирифта буд; боқимондаҳои ин қабилаи як вақтҳо пуриқтидорро то ҳол дар резишгоҳи Миссисипи, дар наздикии халиҷи Атҷафалай ва дар ноҳияҳои Пойнт Купе вохӯрдан мумкин аст.

Ӯ камонашро аз Лузиана оварда буд, вале дуру дароз бекор хобида, ҳатто онро накушода буд. Аз бозӣ ба Техас омаданаш то ҳол воқеае рӯй надода буд, ки он ба хотираш биёяд. Камони зебои чӯбаш афлесунӣ ва тирҳои пардор фаромӯш шуда, дар майдон мехобиданд.

Аммо вақташ расиду Луиза онҳоро ба хотир овард. Ин дере нагузашта, баъд аз гуфтугӯе буд, ки дар аснои ношто воқеъ гардида, падараш танҳо ба сайругашт рафтани ӯро манъ кард.

Луиза бечунучаро ба ин фармон итоат кард; ғайри аз ин, ӯ на фақат танҳо ба гардиш баромаданро бас кард, балки умуман аз аспсаворӣ даст кашид.

Мустанги гули бодом дар оғил маъюс меистод ё худ дар кораль давутоз карда, тааҷҷуб менамуд, ки чаро вай дигар дар пушташ зин — ягона ёдовариро, ки ӯ маҳбус аст, ҳис намекунад.

Вале Луиза маҳбуби худро фаромӯш намекард. Рости гап, ӯ дигар ба сайругашт намебаромад, вале ба ҳар ҳол ҳар рӯз рафта Камарро хабар мегирифт ва ба обу донаш назорат мекард. Ба асп аз беҳтарин гандуми ҳаммаҳои Каса-дель-Корво, алафи сершираи саванна ва аз оби хунуки Леона об медоданд.

Плутон бо ғайрати тамоми ба он нигоҳубин мекард. Ӯ Камарро бо қашав ва чӯткаҳо чунон бо ҷидду ҷаҳд месоид, ки ҷилои пашми он аз пӯсти рӯи сиёҳи вай камтар набуд.

Луиза акнун қариб тамоми вақти холиашро ба камонандозӣ мегузаронид.

Ҷои машғулияти вай боғ буд, ки рафта ба пахтазорон мепайваст. Аз се тараф ба шакли наъл онро дарё печонида гирифта буд; аз тарафи чорум девори паси осиёб онро мепайраст.