Бояд гуфт чунин нафароне ки ба иҷоранишин эҳтиёҷ доранд, аксари вақт ба хадамоти меҳмонхонаҳо муроҷиат мекунанд, то нафари шиносеро ба онҳо тавсия диҳем ва банда низ айнан чунин рафтор намудам. Аз марги дӯсти Беназир ва Сулҳия аз забони шогирдам, ки дар «Кайҳон» кор мекунам хабар ёфтам ва чун шахсияти вайро фаҳмидам, ҳамоно ба Даря Сергеевна занг зада, ӯро аз фоҷиаи ба сари иҷоранишинаш омада огоҳ намудам.
– Мехостам фаҳмам, ки ӯро чӣ ному насабест?
– Сараввал ӯ худро Маликов Файзиддин Сафолович муаррифӣ намуд, вале ин дурӯғи вайро тез ошкор намудам, чунки дӯсте дорам, ки солҳо дар системаи телекомуникатсия кор мекунад ва баъди оне ки ӯро ба меҳмонхона ҷой додам аз ҳамон дӯстам хоҳиш намудам бифаҳмад, аз ҳуҷраи меҳмонхона ба куҷо занг мезанад. Худи шаби аввал ӯ аз меҳмонхона ба хонааш, ки дар шаҳри Чимкенти Ҷумҳурии Қазоқистон воқеъ аст занг зада, аз ҳоли падару модараш пурсон шудааст ва тариқи ҳамон гуфтугӯ мо аниқ намудем, ки вайро чӣ ному насабест.
– Хуш ӯро чӣ ному насабе будааст?
– Норматов Алихон Аслонович.
– Чӣ лозим буд, ки ӯ ному насаби аслии худро пинҳон дорад?
– Ба гумонам ӯ ҳам тоҷир буд, вале на тоҷире ки роҳи ростро пеша намуда, аминам, ки бандаро мефаҳмед?
– Кам, кам.
– Шояд ӯ ба интиқоли маводи мухаддир машғул буд, ҳарчанд ман ба ин чандон боварӣ ҳам надорам.
– Сабаби марги ӯро шумо дар чӣ мебинед?
– Алихон Аслонович болои мардум қарзи ниҳоят зиёд дошт ва аҷаб нест, ки қарздорон баҳри адо накардани қарзи худ ҳисобу китобашонро бо вай баробар накарда бошанд.
– Оё марги Норматов бо марги Беназири Назир пайвастагие дорад?
– То ҷойе, ки банда хабар дорам не.