– Чаро вай худаш нею шуморо ба хонаи бародараш фиристод?
– Чунки ӯро кори аз ин ҳам муҳимтаре дар пеш буд ва акнун ман ба хулосае омадам, ки ӯ боварӣ доштааст, ки хонаи бародараш дар зери назорат будааст.
– Кори муҳим гуфта чиро дар назар доред?
– Ба ростӣ ин таърихи ниҳоят дарозест.
– Ман ба ягон ҷо шитоб надорам, ба фикрам шумо ҳам ба наздикӣ аз ин маҳал берун шуда наметавонед, бо овози бурро бигуфт муфаттиш.
– Ҳамааш аз рӯйи ҳамон касофати Сайф шуд. Охир ман аз куҷо медонистам, ки ӯро чӣ фикру хаёле дар сар аст.
– Ба суоли банда ҳанӯз посух нагуфтаед?
– Ба кадом суолатон?
– Гуфтед, ки ӯро кори муҳиме буд ва он корро таърихи ниҳоят дарозест?
– Сайф аслан аз рӯйи касби суратгирӣ умр ба сар мебарад аминам, ки маро мефаҳмед.
– На он қадар.
– Ӯ тариқи расмҳои гирифтааш гоҳ – гоҳ ҳамёни баъзеҳоро меафшонад, акнун фаҳмидед?
– Шояд рушантар карда гӯед.
– Пусткандаи гап ҳамин, ки ӯ ба шантаж машғул аст.
– Дурӯғ, ҳамааш дурӯғ, қариб ки дод зад Сайф Ниёз.
– Ором шавед!
– Магар баъди чунин туҳмати рӯйирост ором шудан осон аст.
– Агар суханони маҳбубаатонро туҳмат пиндоред, пас куҷост ҳақиқат? – гӯён муфаттиш аз дафтари кории ман бадар рафт. Дар фазои дафтари кории банда, лаҳзае боз хомӯшӣ ҳукумфармо гашт. Ман бори дигар ҳамаи ҳуқуқҳои гумонбаршударо баҳри вай такрор намудам.
– Яъне ки ман метавонам баҳри собит намудани дараҷаи бегуноҳии худ далелҳо пеш оварам ва баҳри санҷиши ҳолатҳои кор, ки метавонанд бегуноҳии маро собит намояд, талабу дархостҳо намоям.