Чу хоҳӣ, ки ёбӣ раҳоӣ зи ман,
Сарафроз бошӣ ба ҳар анҷуман,

Аз Эрон ҳар он чи-т бипурсам, бигӯй,
Матоб аз раҳи ростӣ ҳеч рӯй,

Супорам ба ту ганҷи ороста,
Биёбӣ басе хилъату хоста!

В-ар эдун, ки кажжӣ бувад ройи ту,
Ҳамон банду зиндон бувад ҷойи ту!»

Чунин дод посух Ҳаҷираш, ки «Шоҳ
Зи ман ҳар чи пурсад зи Эронсипоҳ,

Бигӯям ҳама, ҳар чи донам, бад-ӯй,
Ба кажжӣ чаро боядам гуфтугӯй?

Набинӣ ҷуз аз ростӣ пешаам,
Ба кажжӣ наояд худ андешаам.

Ба гетӣ беҳ аз ростӣ пеша нест,
Зи кажжӣ батар ҳеч андеша нест!»

Бад-ӯ гуфт, к-«Аз ту бипурсам ҳама,
Зи гарданкашону зи шоҳу рама,

Ҳама номдорони он марзро,
Чу Геву чу Тӯсу чу Гударзро,

Зи Баҳрому аз Рустами номдор –
Зи ҳар чи-т бипурсам, ба ман баршумор!

Саропардаи дебаи ранг-ранг,
Бад-ӯ-андарун хаймаҳои паланг,

Ба пеш-андарун баста сад жандапил,
1
Яке тахти пирӯза бар сони нил,

Яке зарди хуршедпайкар дурафш,
Сараш – моҳи заррин, ғилофаш – бунафш,

Ба қалби сипоҳ-андарун ҷои кист
Зи гурдони Эрон, варо ном чист?»

Бад-ӯ гуфт, к-«Он шоҳи Эрон бувад,
Ки бар даргаҳаш пилу шерон бувад»

1 Нил – ранги кабуд; гиёҳе, ки аз фишурдааш ранги нилӣ ҳосил мекунанд.