Сипаҳбуд инон аждаҳоро супурд,
Ба хашм аз ҷаҳон равшаноӣ бибурд.

Чу омад хурӯшон ба танг-андараш,
Биҷунбиду бардошт хӯд аз сараш,

Раҳо шуд зи банди зиреҳ мӯи ӯй,
Дурафшон чу хуршед шуд рӯи ӯй,

Бидонист Суҳроб, к-ӯ духтар аст,
1
Сари мӯи ӯ аз дури асфараст,

Шигифт омадаш, гуфт «Аз Эронсипоҳ
Чунин духтар ояд ба овардгоҳ,

Саворони ҷангӣ ба рӯзи набард
Бароранд бар чархи гарданда гард!»

Зи фитрок бикшод печон каманд,
Биандохт в-омад миёнаш ба банд,

Бад-ӯ гуфт, к-«Аз ман раҳоӣ маҷӯй,
Чаро ҷангҷӯӣ ту, эй моҳрӯй?

Наомад ба домам ба сони ту гӯр,
Зи чангам раҳоӣ наёбӣ, машӯр!»

Кушодаш рух он гоҳ Гурдофарид,
Мар-онро ҷуз ин ҳеч чора надид,

Бад-ӯ рӯй бинмуд, гуфт: «Эй далер,
Миёни далерон ба кирдори шер,

Ду лашкар назора бар ин ҷанги мо,
Бад-ин гурзу шамшеру оҳанги мо,

Кунун ман кушода чунин рӯю мӯй,
Сипоҳ аз ту гардад пур аз гуфтугӯй,

Ки бо духтаре ӯ ба дашти набард
Бад-инсон ба абр-андар овард гард,

Набояд, ки чандин диранг оварад,
К-аз ин разм бар хеш нанг оварад!

Ниҳонӣ бисозем, беҳтар бувад,
Хирад доштан кори меҳтар бувад,

Асфар – зард.