Биҷусташ фаровон ба гирди ҷаҳон,
Ки ёбад магар з-ӯ ба ҷое нишон,

Ҳама шаҳри Эрону Тӯрон ба пой
Сипарданду н-омад нишонаш ба ҷой.

ДИДАНИ КАЙХУСРАВ БЕЖАНРО
ДАР ҶОМИ ГЕТИНАМОЙ

Чу Наврӯзи хуррам фароз омадаш,
Бад-он ҷоми фаррух ниёз омадаш,

Биомад пуруммеди дил паҳлавон,
Зи ранҷи писар кӯж гашта навон.

Чу Хусрав рухи Гев пажмурда дид,
Дилашро ба дард-андар озурда дид,

Биомад, бипӯшид румиқабой,
Бад-он то бувад пеши Яздон ба пой.

Зи фарёдрас зӯру фарёд хост
В-аз Аҳримани бадкуниш дод хост.

Хиромон аз он ҷо биомад ба гоҳ,
Ба сар барниҳод он кайонӣ кулоҳ.

Пас он ҷом бар каф ниҳоду бидид,
Дар ӯ ҳафт кишвар ҳаме бингарид.

Зи кору нишони сипеҳри баланд
Ҳама кард пайдо чиву чуну чанд.

Зи моҳӣ ба ҷом-андарун то бара
Нигорида пайкар бад-ӯ яксара.

Чи Кайвон, чи Ҳурмуз, чи Баҳрому Шер,
Чи Меҳру чи Моҳу чи Ноҳиду Тир,

Ҳама буданиҳо бад-ӯ андаро
Бидидӣ ҷаҳондори афсунгаро.

Ба ҳар ҳафт кишвар ҳаме бингарид,
Ки ояд зи Бежан нишоне падид.

Суи кишвари Гургсорон расид,
Ба фармони Яздон мар-ӯро бидид,