Алла гӯяд модарам

Алла гӯяд модарам
Аз барои хоҳарам,
Мешавад беихтиёр
Чашмони ҳама хумор.
Аз аллаш хоб ояд,
Як хобаки боб ояд.

Алла гӯяд модарам,
Ҳамаро менигарам,
Асал дорад аллаш,
Шакар дорад аллаш.
Чун сар монӣ ба болин,
Меояд хоби ширин.

Аллаи модарамро
Ҳама медонад ин ҷо:
Ҳам бобоям медонад,
Ҳам момоям медонад,
Ҳам додому ҳам Гулнор,
Ҳам худам шабе сад бор
Бо чашми хумор-хумор
Мекунам беихтиёр
Аллаи ӯро такрор.

Аллаи модарамро
Ҳама мехонад ин ҷо:
Ҷӯяки дари хона,
Мурғаки сари лона,
Бо модарам баробар
Алла гӯяд то саҳар.