Машав навмед аз лутфи Худованд,
Ки бе уммед ҳар дам дарбимонӣ.

---

Агар одат кунӣ дар зиндагонӣ
Ба некӣ, ҳеҷ гоҳе дарнамонӣ.
Зи ҳар айбу гуноҳе пок гардӣ,
Агар хайру саховатро бидонӣ.

---

Ба ризқе, ки бидодӣ, шукр гӯям,
Худоё, ҷуз ризои ту наҷӯям.
Надорад ҳиммати ту ҳеҷ поён.
Ба ғайр аз роҳи ту роҳе напӯям.

---

Набошад дар касе иймон, аё дӯст,
Бувад адр асл ӯ шайтон, аё дӯст.
Агар худро надорад аз гунаҳ дур,
Куҷо бошад дар ӯ виҷдон, аё дӯст?

---

Агар дил бар муҳаббат мубтало шуд,
Бидон, ки дил гирифтори бало шуд.
Ба сар омад зи қисмат, ҳар чӣ омад,
Агарчӣ он хато буду хато шуд.

---

Шавад ин ҷону дил қурбонат, эй ёр,
Ки қалбамро намудӣ дарк ҳар бор.
Бувад меҳру вафо ҳастият, эй дӯст,
Бароям ин ҷаҳон бе ту чӣ даркор?

---

Ало, мурғони дар парвози шӯҳрат,
Ки карда кибрро бар хеш зинат,
Нагашта хок, биншинед бар хок,
Ба шайтон ҳамраҳӣ орад надомат.

---

Кунад аз дарду ғамҳо дард ҷонам,
Расад ё бар фалак оҳу фиғонам,
Нахоҳам кард умеде, ки бипурсад
Зи аҳволи фигорам меҳрубонам.

---

Агар қаср аз тило созӣ ту бунёд,
Расад рӯзе, шавад он қаср барбод.
Ба мӯҳтоҷе агар ёрӣ намоӣ,
Ду дунёят бигардад бешак, обод.

---

Туӣ фарзанди ман, бахту сурурам,
Ту ҳастӣ муттако, бар чашм нурам.
Ту ҳастӣ давлати беинтиҳоям,
Ту ҳастӣ қуввати ақлу шуурам.

---

Ба дунё зиндагонӣ бе ту мушкил,
Муроди ман нагардад бе ту ҳосил.
Ту обӣ, бе ту ҳар дам метапам ман
Чу моҳӣ, ки фитода рӯйи соҳил.

---

Ба сони барг амонат бошад ин ҷон,
Макони мо бигардад хок поён.
Чаро мо қадри умри худ надонем?
Набошад ҷовидонӣ умри инсон.