Бирав, биштоб доим бар накӯӣ,
Ки ин дунё нахоҳад монд яксон.

---

Ғами дунё надорад ҳеҷ поён,
Куҷо дорад вафо ин чархи гардон?
Агар рӯзе балое бар сар ояд,
Ба меҳру оқибат рӯ орад инсон.

---

Чӣ бад, гар аз даҳон бидҳӣ ғазоро,
Гузорӣ кори хубе ё ба фардо.
Ба кизб олуда созӣ хонаи дил,
Равӣ бо номи бад аз дори дунё.

---

Ба ноуммедӣ хӯ кардан набояд,
Тамасхур бар касе кардан нашояд.
Талошу ҷаҳд кун дар зиндагӣ, лек,
Макун коре, ки аз дастат наояд.

---

Наҷустан аз касе имдод беҳтар,
Накардан аз касе фарёд беҳтар.
Бувад беҳтар бипурсидан зи Яздон,
Гаройидан ба адлу дод беҳтар.

---

Расӣ бояд ба қадри навҷавонӣ,
Кунӣ обод боғи зиндагонӣ.
Ҳама виҷдони худро пок дорӣ,
Равӣ дунболаи некӯнишонӣ.

---

Даво пайдо шуд ар, дармон шавад дард,
Шунав, гӯяд агар айби ту ҳамдард.
Ба гардан гиру айбатро кун ислоҳ,
Машав ҳаргиз аз ин озурда, эй мард!

---

Намирад ҳеҷ гаҳ шамъу чароғат,
Хазон н-ояд ҳаме дар кӯчабоғат.
Занад туғён ҳамеша қалби покат,
Набинад ҳеҷ гаҳ ёрон-т доғат.

---

Худо хоҳад агар ризқи ту додан,
Нагардад кам ба додан ё ситодан.
Машав навмед дар дунёи фонӣ,
Ки расмаш хестан, гоҳе фитодан.

---

Ба некон ҷони худ доим фидо кун,
Ҳамеша неку бад аз ҳам ҷудо кун.
Агар хоҳӣ, ки некӯкор бошӣ,
Ба некон қалби худро ошно кун.

---

Бувад ин умр кӯтоҳ,эй бародар,
Аҷал ҳар лаҳза ояд аз паси дар.
Агар хоҳӣ халосӣ аз уқубат,
Зи ҳар ҳою ҳавои даҳр бигзар.

---

Ба уммеде намояд зиндагонӣ,
Дар ин дунёи дун инсон, бидонӣ.