Соҳиб Камол

ДУБАЙТИҲО

---

Яке дер ар равад, дигар равад зуд,
Аз ин дунё, ки фонӣ асту маҳдуд.
Бувад инсони бад будан чӣ осон,
Чӣ мушкил нек будан, марди масъуд!

---

Касе дорад гиромӣ дӯстонро,
Фидо созад барои дӯст ҷонро,
Сазад, дар назди ӯ таъзим созӣ,
Бубахшӣ баҳри ӯ ҷону ҷаҳонро.

---

Бисозад ҷаннате бар хеш бунёд,
Касе гар қалби зоре созад обод.
Чӣ донад сангдил ҳоли дили зор?
Зи дасти сангдил фарёд, фарёд!

---

Бувад сангин зи кӯҳе бори миннат,
Кашидан инчуиин бор аст зиллат.
Нибигзорад, кушоӣ чашми худро,
Агар накшода бошӣ чашми фитрат.

---

Чӣ суд аз роҳату айши фаровон,
Зи дебоҳои зебо, қасру айвон?
Чӣ суд аз ганҷи дунё, эй бародар,
Агар дар дил набошад нури иймон?

---

Зи бекорон Худо безор бошад,
Касе бекор гардад, хор бошад.
Чу санги осиё мебош гардон,
Ки санги осиё пурбор бошад.

---

Сарат рӯзе расад ногоҳ бар санг,
В-агар ғам бар гиребонат занад чанг,
Сабуру ботаҳаммул бош, эй дӯст,
Расад бо сабр дарвеше ба авранг.

---

Касе, к-ӯ дар ғами мардум кашад ғам,
Нагардад дар ду дунё ҳеҷ гаҳ кам.
Касе, ки бишканад қалби касеро,
Шавад рӯзе шикаста дар ду олам.

---

Агар фарзанди худ марди худое,
Кунад бар ақлу дониш раҳнамоӣ,
Бигирад меваҳои шаҳду шаккар
Ба сони боғбони ҷонфидое.

---

Агарчӣ аз тило созанд тахтат,
Надорад арзиш, ар накшуд бахтат.
Наҷӯӣ гар мурод аз зиндагонӣ,
Бидон, н-оварда бореро дарахтат.

---

Ба ин дунёи ду-серӯза инсон,
Биёяд, бозгардад ҳамчу меҳмон.