меҳнат, ки дар шартномаи меҳнатӣ пешбинӣ нашудааст, аз иҷрои кор даст кашад, корфармо асос надорад ӯро ба ҷавобгарии интизомӣ кашад. Корфармо ва намояндагони ӯ ҳақ надоранд, ки кормандонро аз худмуҳофизати ҳуқуқҳояшон маҳрум созанд. Дар байни кафолатҳои муқарраркардаи КМ ҶТ, ҷуброни зиёне, ки ба ҳаёт ё саломатии корманд ҳангоми иҷрои вазифаҳои меҳнатӣ расонида шудааст, аҳамияти муҳими иҷтимоӣ дорад. Ин ҷуброн тибқи қарори Ҳукумати Ҷумҳурии Тоҷикистон аз 21 октябри соли 2014, №661 «Дар бораи Тартиби аз ҷониби корфармо ҷуброни зарар бо сабаби бад шудани саломатӣ ё фавти корманд», пардохт карда мешавад.

Агар корманд тибқи меъёрҳои муқарраршуда бо воситаҳои муҳофизати инфиродӣ ва дастаҷамъӣ таъмин карда нашавад, корфармо ҳуқуқ надорад, ки аз корманд иҷрои вазифаҳои меҳнатии ӯро талаб кунад ва бояд вақти бекористии бо ин сабаб ба амаломадаро мутобиқи моддаи 157 КМ ҶТ пардохт кунад. Ин кафолат дар моддаи 335 КМ ҶТ, ки таъминоти кормандон бо воситаҳои ҳифзи инфиродӣ ҳангоми кор дар шароити зарарнок ва (ё) хатарноки меҳнат, инчунин дар корҳое, ки дар шароити махсуси ҳароратӣ иҷро мешаванд ё бо ифлосшавӣ алоқаманданд, пешбинӣ мекунад. Кафолати дигар додани шир ва хӯроки табобатию пешгирикунандаро дар бар мегирад (моддаи 334 КМ ҶТ). Ҳангоми кор дар шароити зарарноки меҳнат, ба кормандон мувофиқи меъёрҳои муқарраршуда шир ё дигар маҳсулоти ба он баробар ва ҳангоми кор дар шароити махсусан хатарнок бошад, хӯроки табобатию пешгирикунанда ройгон дода мешавад.