Тибқи моддаи 1 КМ ҶТ зери мафҳуми ҷойи кор – ҷойи доимӣ ё муваққатии аз тарафи корфармо таъсисдодашуда, ки корманд дар раванди фаъолияти меҳнатӣ уҳдадориҳои меҳнатиашро иҷро менамояд, фаҳмида мешавад.

Агар корманд дар филиал, намояндагӣ ё дигар воҳиди алоҳидаи ташкилоте, ки дар маҳалли дигар ҷойгир аст, барои кор қабул карда шавад, дар ин ҳолатҳо ҷои кор бо нишон додани воҳиди сохтории алоҳида ва маҳалли ҷойгиршавии он муайян карда мешавад.

Функсияи меҳнатии корманд ҳамчун кор аз рӯи вазифа мувофиқи ҷадвали воҳидҳои корӣ, касб, ихтисос бо нишон додани тахассус, намуди мушаххаси коре, ки ба корманд супорида шудааст, муайян карда мешавад.

Ба шартҳои ҳатмии шартномаи меҳнатӣ шарти санаи оғози кор дохил карда мешавад. Ин сана (рӯзи мушаххас) одатан дар шартномаи меҳнатӣ ва дар санади (фармоиш) корфармо нишон дода мешавад, ки оғози корро ба расмият медарорад. Он аз рӯзи ба имзо расидани шартномаи байни корманд ва корфармо эътибор пайдо мекунад, агар дар санадҳои меъёрии ҳуқуқӣ ё шартномаи меҳнатӣ тартиби дигаре муқаррар нашуда бошад.

Корманд вазифадор аст ба иҷрои вазифаҳои меҳнатӣ аз рӯи дар шартномаи меҳнатӣ пешбинишуда оғоз намояд. Агар дар шартномаи меҳнатӣ рӯзи оғози кор пешбинӣ нашуда бошад, пас корманд метавонад дар рӯзи дигари корӣ пас аз эътибор пайдо кардани шартнома ба кор шурӯъ кунад.