Устод Табаров ҳанӯз аз синни 14-солагӣ ба навиштани хабарҳо оғоз намудааст ва дар қисмати «Рӯйхати асарҳои чопшудаи С.Ш.Табаров» номгӯи хабарҳо, асару мақолаҳои илмӣ, илмӣ-оммавӣ, китобҳои дарсӣ, дастуру восита ва барномаҳои таълимӣ мувофиқи соли ба табъ расидаашон (солҳои 1938-1984) қайд гардидаанд. Дар ин қисмат хонанда на танҳо оид ба ном, соли чоп ва макони нашру миқдори саҳифаҳои таълифоти хурду калони муаллиф маълумот мегирад, инчунин аз тақризҳои ба ин ё он асари устод навиштаи олимону мутахассисон низ иттилоъ пайдо мекунад. Масалан, аввалин китоби устод Табаров бо номи «Материалҳо оид ба омӯхтани адабиёти советии тоҷик» соли 1948 аз тариқи Нашриёти давлатии Тоҷикистон нашр мешавад. Аз феҳристнома маълум мешавад, ки дар бораи ин китоб соли 1950 тақризи Я.Исоев ва соли 1951 тақризи Х.Мирзозода ба табъ мерасанд.
Дар қисмати «Асарҳои таҳриркарда ва тартибдодаи С.Ш.Табаров» номгӯи асару маҷаллаҳое оварда шудаанд, ки таҳти назари домулло Табаров ба табъ расидаанд ё устод дар таҳриру мураттабсозии онҳо фаъолона ширкат варзидааст.
Бояд гуфт, ки нақши муҳаррир дар асарҳои бадеӣ ва илмӣ басо калон ва калидӣ мебошад ва муҳаррироне чун устод Табаров бо дониши фарогир, масъулияти баланди корӣ ва муносибати холисона ба такмили ҷанбаи илмии асару мақолаҳои таҳриршаванда мусоидат карда, бо ҳамин дар рушду нумӯи илму фарҳанги тоҷик дар замони шӯравӣ ҳиссаи арзанда ҳамроҳ намудаанд. Китобҳои таҳриркардаи устод Табаров, аз ҷумла «Саҷъ ва сайри таърихии он дар насри тоҷик» - и Р. Мусулмонқулов, «Ғазал ва анъанаи он дар эҷодиёти устод Абулқосим Лоҳутӣ»-и М. Давлатов, «Очерки эҷодиёти даҳанакии Кӯлоб»-и Р.Амонов, чун намунаи олии ҳамкории муҳарриру муаллиф дар таърихи илми филологияи тоҷик эътибори калон доранд.
Қисмати асосии феҳрист бо унвони «Адабиёт дар бораи ҳаёт ва фаъолияти С.Ш.Табаров» ба охир мерасад. Дар ин бахш ҳамаи мақолаҳое, ки ба ҳаёт ва осори муаллиф бахшида шудаанд ё ба фаъолияти устод қисман дахл кардаанд, мувофиқи тартиби алифбо ном бурда мешаванд.