ДИЛАМ ШИКАСТ...

Охир дилам шикаст, ки бечора ӯ надошт
Тоби малоли зиндагии хешро дигар,
Охир дилам шикаст, ки бечора ӯ надошт
Тоби заволи зиндагии хешро дигар...

Охир дилам шикаст ба монандаи булӯр,
Барҷош шуд ба хоки сиёҳ ояҳои нур.
Барҷош шуд ба хоки сиёҳ ишқи зиндагӣ,
Барҷош шуд ба хоки сиёҳ ғуссаву сурур...

Шояд баҳор ояду шояд ҳазор ноз
Дар қалбҳои духтаракон лона мекунад.
Аммо дили шикаста аз ин тангнои гӯр,
Тарки ҳавои олами афсона мекунад.

Бечора моми ман, ки дигар аз даҳони кас
Шеъре шунид, бо ғами ман гиря мекунад.
Бечора килки ман, ки ба як гӯша дилҳазин
Умре дар интизори сухан гиря мекунад...