иҷорагирифта бо ҷонибҳои мувофиқа ва бо фосилаҳои нобаробари амалисозии онҳо дар тӯли муҳлати лизинг.

Вобаста ба ликвиднокӣ ё тағйирёбии мавқеи қарзи соф дар давоми давраи муайян намудҳои зерини селаҳои пулиро аз ҳамдигар фарқ мекунанд:

— ликвиднок — яке аз нишондиҳандаҳоест, ки бо кӯмаки он тағйирёбии вазъи молиявии корхонаро дар давоми вақт арзёбӣ намуда, тағйири мавқеи қарзи софи корхонаро дар тӯли давра ифода мекунанд. Дар ин ҳолат мавқеи қарзи соф фарқи мусбати байни ҷамъи қарзҳои гирифтаи корхона ва ҳаҷми воситаҳои пулӣ мебошад;

— ғайриликвиднок — тағйироти манфии мавқеи кредитии софи корхонаро дар давоми давра нишон медиҳад. Дар ин ҳолат мавқеи қарзи соф фарқи манфии байни ҷамъи қарзҳои гирифтаи корхона ва ҳаҷми воситаҳои пулӣ мебошад.

Ҳангоми ҳалли масъала оид ба имконияти қарзҳои кӯтоҳмуддат бонк ба ликвиднокии дороиҳои корхона ва қобилияти он ҷиҳати ҷамъоварии воситаҳои пулӣ аҳамият медиҳад, ки барои пардохтани қарз лозиманд.

Селаи пулии ликвиднок бо нишондиҳандаи фишанги молиявӣ — ҳудуде, ки то ба он фаъолияти корхонаро аз ҳисоби қарзи бонк беҳтар метавон кард, робитан наздик дорад. Селаи пулии ликвиднок бо формулаи зерин ҳисоб карда мешавад:

СПЛ = - [(КДох + ККох — ВПох) - (КДоғ + ККоғ — ВПоғ)]

Дар ин ҷо: СПЛ — селаи пулии ликвиднок; КДох, КДоғ — қарзҳои дарозмуддат дар охир ва оғози давра; ККох, ККоғ — қарзҳои кӯтоҳмуддат дар охир ва оғози давра; ВПох, ВПоғ — воситаҳои пулӣ дар охир ва оғози давра.

Вобаста ба хусусиятҳои пайдарпайнии воридоту содирот дар давоми вақт селаҳои пулӣ метавонанд чунин бошанд:

— релевантӣ — дар онҳо селаи пулӣ дорои аломати манфӣ як маротиба ба селаи аломаташ мусбат иваз карда мешавад. Селаҳои пулии релевантӣ барои лоиҳаҳои сармоягузории стандартӣ, муқаррарӣ ва нисбатан оддӣ, ки дар онҳо пас аз марҳилаи сармоягузории ибтидоӣ, яъне содироти воситаҳои пулӣ, воридоти дурудароз фаро мерасад, хос мебошанд;

— ғайрирелевантӣ — барои онҳо вазъи ба навбат омадани содирот ва воридот хос аст.