МУРҒИ ДАШТӢ

- Эй мурғи даштӣ,

Аз кўҳ гузаштӣ

Бобома дидӣ?

Савғома додӣ?

Бобом саломат?

Аз рўзи рафтан

Чаро то ин дам

Хаташ наомад?

ЧУМЧУҚИ ДАШТӢ

Чумчуқи даштӣ,

Гаштиву гаштӣ,

Барои мўят

Шона наёфтӣ,

Шона, ки ёфтӣ,

Хона наёфтӣ,

Хона, ки ёфтӣ,

Дона наёфтӣ.

ЧОЙРЕЗАКИ ДОДОМ

Олуча гули бодом,

Ман духтараки додом.

Додом шишта чой хўранд,

Ман чойрезаки додом.

ДАСТЁРИ ДОДО

Додо, калонак шудаям,

Кўчадавонак шудаям,

Китобхонак шудаям,

Додо , ба ман китоб харед,

Додо, мана мактаб баред.

Додо, манам дилсўзатон,

Ҷома, гиребондўзатон.

Додо, ба ман дафтар харед,

Додо, мана мактаб баред.

(БАРОИ ХОНАНДАГОНИ СИНФҲИ 1)

СИНФИ 1

ҲАВО, РЎТА КУШО

Ҳаво, ҳаво, рўта кушо,

Тортораки мўта кушо,

Дарҳои осмона кушо,

Хушрўю тобона кушо,

Кўдакон бозӣ кунанд,

Бозӣ кунанд, шодӣ кунанд.

ОФТОБ

Офтоб барод ба рўям,

Нуқрапўпак ба мўям,

Ҳалқаи зар ба гўшам,

Чойнаки чой ба пешам,

Рехта диҳам ба хешам,

Ба хешаки хушрўям,

Хушрўи қиссагўям.

ҶАЙРА

Ҷайра баромад дар адир,

Дар даҳони ҷайра фатир,

Боғома кардаст ҷазир.

Ҷайра баромад тохта,

Ҳар хоракаш сих сохта,

Дар сари ҷайра нўхта.

Ҷайра тарсонд калбуза,

Сайри полиз то рўза,

Бобо, чӣ шуд харбуза?

МУШАК- МУШАК

Мушак-мушак, гардоне,

Осиёби вайроне.

Орда биёр, кулча кунем,

Ба рўйи лаълича кунем.

Атолаи кочӣ кунем.

Орд, ки нест бо чӣ кунем?

Гандума деҳ, бирён кунем,

Дар тагаки дандон кунем.

Чормағза деҳ, ғелон кунем,

Пистая деҳ, хандон кунем.

БОФ-БОФ

Зилзиламоҳ, найча биёр,

Калобаи оча биёр,

Аз дару дарбача биёр,

Сабади пуркулча биёр.

Найчая пур-пур кунем,

Кулчая хўр-хўр кунем.

Боф-боф кунем дар дукон,

Курта шавад ба Мавлон.

ЛАКЛАКИ ҲИСОРӢ

- Эй лаклаки ҳисорӣ,

Ту хона куҷо дорӣ?

-Дар шохи чанор дорам,

Сад хона қатор дорам.

- Эй лаклаки ҳисорӣ,

Ба хона чӣ меорӣ?

- Маскаву панир орам,

Кулчаву фатир орам.

САВОР ОМАД

Дакар-дукур кӣ омад?

Аз боло савор омад,

Аз мулки Ҳисор омад,

Бобо Зулфиқор омад,

Қамчин думи мор омад,

Сандуқ ба канор омад,

Чил аспи қатор омад.

Дар тагаки дарвоза

Момои Хумор омад,

Ҳамчун гули нор омад,

Монанди баҳор омад.

БОЗӢ КУНАМ

Дадам харид радиё,

Симчаҳояш аз тилло.

Радиёро гўш кунам,

Овозашро хуш кунам,

Ба созаш бозӣ кунам,

Очама розӣ кунам.