Ҳафс ибни Умар: Чаро шумо намефаҳмед, ки ин банда ҳам метавонад аз ҷониби он ду-се кас маъмурият дошта бошад?

Ашнас: Ҳуҷҷат?

Ҳафс ибни Умар (худро бар зӯр даст гирифта): Кай шудааст ки асрори шоҳонро ба ходимаке арза доранд?!

Ва ба хашм аз назди Ашнас дур мешавад. Ходими халифаи хилофат ва намояндаи шоҳи Хуросон дар кори худ у Амри Лайс ҳайрон мемонад. Агар ҳисоби ишонро Худо наёбад, бандааш оҷиз аст! Ҳатто халифаи мусулмонон аз макри ишон оҷиз мондааст. Чӣ расад ба ғуломе ҳамчун ӯ?!

Ҳафс ибни Умар сар ба ҳуҷраи Амри Лайс халонд. Ӯ ҳанӯз дар хоб буд. Боз дарро ба рӯяш баста ба кофтукови саройдор баромад. Лаҳзае нагузашта онҳо дар ҳавлии корвонсарой суҳбат мекарданд. Ва дар фарҷом саройдор Ҳафс ибни Умарро дилпур кард, ки : “Мутмаин бошед, дигар навбати ба амирам хизмат кардани мо расидааст. Агар ин лаҳза иқдом накунем, пас аз будани мо чӣ суд?”

Ҳафс ибни Умар: Ба шаҳрдор ҳамаашро бифаҳмонед. Ё ҳоло ва ё ҳеҷ гоҳ!

Онҳо аз ҳам ҷудо шуданд. Ҳафс ибни Умар ба ҳуҷраи худ рафт. Амри Лайс ҳанӯз дар хоб буд ва гоҳ аз гоҳ аной мегуфт. Ҳанӯз таб дошт. Ҳафс ибни Умар ӯро боэҳтиёт бедор кард. Амри Лайс аз дидани ӯ дар ҳайрат монд.

Амри Лайс: Чаро ҳанӯз нарафтаӣ?

Ҳафс ибни Умар: Амирам таб доштанд, салоҳ дар он дидам, ки то ба по хестани амирам ҳамроҳашон монам. Эҳтимоли он меравад, ки ҳамроҳ меравем. (Ва бо овози хафӣ) Ашнас гумонбар шудааст. Ӯ ҳатто розӣ нест, ки пизишкро даъват кунад. Иншоаллоҳ, ҳама корҳо хуб мешавад. Фақат шумо бемории хешро ваҳимтар вонамуд намоед. Мобақии кор дар дасти мост.

Амри Лайс: Шаҳрдор хабар дорад?

Ҳафс ибни Умар: Мешавад. Шумо тибқи гуфтаи ман амал кунед, ҳама корҳо хуб мешавад. Шуморо сиҳат ва саломат ба манзили мурод хоҳем расонид.

Амри Лайс: Гумон намекунам. Хобамро дидам...

Ба ҳуҷра ворид шудани Ашнас ва пизишк риштаи сӯҳбати ишонро бурид. Табиб пас аз муоянаи дуру дароз бемории Амри Лайсро ваҳим муайян намуда, фармуд ки бемор бояд бештар истироҳат кунад...