Амри Лайс: Аз рӯйи хирс онро аз пои ман даровард. Ва сарбоз тозиёне чанд бар сари ғулом мезанад ва ӯро маҷбур месозад, ки худ онҳоро бар пои амир бипӯшонад.

Ҳамӯя: Ҳарчанд амир имрӯз асир аст, боз бар ту хоҷа аст. Ҳеҷ ғуломе ҳаққи тасарруф бар моли хоҷаи хеш надорад. Магар ба шумо нагуфта буданд?..

Ва тозиёнае дигар бар сараш мезанад, ғулом аз ҷазбаи дард бо ду даст сарашро дошта, бар замин мешинад. Сарбоз бо ишорати сар савореро амр медиҳад, ки аспашро барои Амри Лайс холӣ кунад. Ва Амри Лайс дар иҳотаи сарбозони савора ба роҳ меуфтад. Ва сарбози пиёда ғуломро пешандоз карда, бо дигар асирон ҳамроҳ месозад.

Амир Исмоил дар издиҳоми мардум аз масҷиди ҷомеи шаҳри Балх берун меомад. Бо мардуми шаҳр самимона, ҳамчун ёрони қадим сӯҳбат мекард. Ба ҳамин минвол ба майдони шаҳр расиданд. Аз тарафи муқобил Амри Лайсро бо гурӯҳе асирон меоварданд. Амри Лайс бо дидани амир Исмоил хост аз асп пиёда шавад, вале солори ғозиён чанд гоми тунд тарафи ӯ зад.

Амир Исмоил: Ба арвоҳи падарат, аз сари заҳмат гузар, ки басо хаста шудаӣ. Ман имрӯз ба ту он кунам, ки мардумон аҷаб доранд, зеро ту шоистагии ҳама гуна эҳтиромро доро ҳастӣ. (Ба чокаронаш). Амири Хуросонро ба саропарда фуруд оваред ва асбоби фароғати ишонро фароҳам созед.

Чокарон Амри Лайсро ба сӯйи кушке мебаранд, ки худ амир Исмоил он ҷо фуруд омада буд. Солори ғозиён ба роҳбари бародараш Абуюсуфро, ки чун муҳофизе аз ӯ дур намешуд, гуфт:

• Мувозиби Амри Лайс бошед. Ӯ дӯстон ва душманон дорад. Мабод, ки ҳаводисе рух диҳад ва зомин мо бошем. Бигзор имрӯз истироҳат кунад, фардо сӯҳбат хоҳем дошт.

Ҳорун: Бо дигар асирон чун рафтор кунем?

Амир Исмоил: Аввалан боэҳтиром рафтор кунед, эшонро ғизо диҳед ва ризояташонро бипурсед: Ҳар киро мехоҳад бо мо бимонад, ӯро нигоҳ доред ва дар байни лашкар тақсим кунед ва он, ки дигар ҷангидан намехоҳад, ӯро раҳо кунад, ба зодбуми хеш баргардад...