ВАТАН

Ҳар ғариберо ғами баргаштан аст,
Фикри умраш дар Ватан бигзаштан аст.

Гар Ватан аз гӯшаи имон бувад,
Қиблагоҳи ҳар як одам меҳан аст.

Аз парешонӣ ҳама омад баҳам,
Сулҳи мо дар аҳду паймон бастан аст.

Мақсади деринаи аҷдоди мо
Васли худ бо асли худ пайвастан аст.

Бо шаҳомат дар Ватан рамзи Ватан,
Ҳайкали Сомонӣ дар шаҳри ман аст.
О Р З У

Аё мурғи сабукболи гаронбор,
Нагашта хаста ту парвоз дорӣ.
Ба чашми зиндагӣ дида гаҳе нам,
Ба тори бенавояш роз дорӣ.

Дар ин дунёи ширини хаёлӣ,
Дар ин дунёи рангини хаёлӣ.
Дар ин дунёи сангини хаёлӣ,
Дар ин дунёи нангини хаёлӣ.
Парастуи хаёлам парфишон аст,
Барои ҳастияш бозии ҷон аст.

Парастуи хаёлам мезанад бол,
Раҳи парвози дури хеш кобам.
Бубинад то дар ин саҳрои сарсабз
Барои зиндагиам офтобам.
СУХАН

Сухан дар зиндагонӣ раҳнамо аст,
Сухан андар замон мушкилкушо аст.
На кас ӯро харад, на кас фурӯшад,
Сухан чун дурру гавҳар бебаҳо аст.

Суханро ибтидову интиҳо аст,
Забони сарвару шоҳу гадо аст.
Набошад марҳаме заҳри суханро,
Ки захми ханҷари ӯ бедаво аст.

Сухан гаҳ душману гаҳ ошно аст,
Забондонро сухан доди Худо аст.
Набошад гар сухан набзи вуҷудам,
Чаро дунёи хомӯшон ҷудо аст?

Сухан сарчашмаи илҳоми мо аст,
Сухан ҳам пухтаву ҳам хоми мо аст.
Набошад лаҳни ширине ба ҷуз ӯ,
Чу шаҳди зиндагӣ дар коми мо аст.