Мувофиқи рақамҳои дар ҷадвали №39 овардашуда истеҳсолкунандагони асосии платина дар ҷаҳон Африкаи Ҷанубӣ ва Россия мебошанд. 67% истеҳсоли ҷаҳонии тиллои сафедро Африкаи Ҷанубӣ ва 20%-и онро Федерасияи Россия таъмин менамоянд.

Ҳаҷми солонаи истеҳсоли тиллои сафед дар Россия 130-140 тоннаро ташкил медиҳад, ки аз ин ҳаҷм ҳар сол ба бозорҳои ҷаҳонӣ ба ҳисоби миёна то 40 тонна бароварда мешавад.

Вобаста ба хусусиятҳои хоси он даҳсолаҳои охири асри XX бинобар ҳарчи бештар дар соҳаҳои дақиқи истеҳсолот, автомобилсозӣ истифода гардидани он талабот ба платина нисбат ба тилло зиёд шуда истодааст.

Арзиши як унтсияи тройи платина 427 доллари американӣ муайян шудааст, ки нисбат ба арзиши тилло 50% қиматтар аст.

Ҷадвали №39
Бозори ҷаҳонии платина (бо ҳаз. унтсияи трой)

Маҷмӯи таҳвилоти ҷаҳонии платина дар соли 1999 - 157,7 т. ташкил дод.

Палладий (Pd) - дар намуди зоҳирӣ ва хусусият ба платина монанд буда, қобилияти хубтари ба худ кашидани гидрогени газгунро дорад. Палладийро соли 1803 олими англис У.Волластон кашф намудааст. Палладий ҳам монанди платина дар протсесси тоза кардани мис ва никел истеҳсол карда мешавад. Аз се ду ҳиссаи ҳаҷми умумии истеҳсолоти ҷаҳонии палладийро (5 млн. унтсияи трой) Федерасияи Россия таъмин менамояд.