мондааст, нишастам. Ин иншоот аз он вақт, ки аз нерӯгоҳи пуриқтидор қувваи барқи баландшиддат расид, матрук шудааст. Аз миён бисту панҷ-сӣ сол гузашта бошад ҳам, ба ин иншооти хурд боду борон чандон таъсир нарасондааст.

Яке ба гӯшам садои нарм-нарм погузорӣ ва хиширроси либос расид. Аҷабо, лӯлидухтар ин ҷо чӣ кор мекунад? Вай рост тарафи ман меомад.

• Салом!

Рости гап, каме ҳиҷил шудам, ки аз ман пеш салом кард.

• Мумкин наздат шинам?

• Бемалол.

Ман чунон вонамуд мекардам, ки ҳузури ӯ бароям фарқе надорад. Мазмун, рафторам ба вай маъқул набуд, ки беқарорӣ мекард: сангҳои зери пояшро як-як чида, ба пастӣ ҳаво медод, тез-тез гулӯ меафшонд. Ман оҳиста зери чашм ба ӯ менигаристам. Шайтон-е, вай ҳам дуздида нигоҳ мекардааст. Хандид.

• Чаро механдӣ?

• Худат-чӣ?

• Ин ҷо чӣ кор мекунӣ?

• Аз паси ту омадам.

• Омадӣ, ки пули мондагии лабчангро рӯёнӣ?

• Ин чӣ гапе, ки ту мегӯӣ?! Ман... ман магар гунаҳгорам? Охир, падарам... Аз ҷониби ӯ, ба ҳар ҳол, аз ту узр мепурсам.

Аз гапҳои берабти духтарак чизе намефаҳмидам.

• Чӣ хел узр? Охир, падарат ба ман лабчангро арзон фурӯхт, ту аз ин норозӣ будӣ...

• Пас ту хабар надорӣ...

• Аз чӣ?

• Эҳ, ту чӣ хел баҷаи лабкашол будай, боз шон - донишҷӯӣ. Дар рӯзи равшан дар зодгоҳи худат кисаатро буранд, намефаҳмию дар шаҳр...

• Чиҳо мегӯйӣ, духтарак? Аз куҷо медонӣ, ки ман донишҷӯӣ ҳастам?

• Ма, бигир, бисотата.