---

Боз шуд чун калобаи хуршед,
Риштаи нур бар замин печид.

---

Дар зимистони ҳаҷр сардам зад,
Боз кун оғӯши баҳоратро.

---

Пой бар пой з-он намепечад,
Ки ба навбат риоя месозанд.

---

Бе тамаъ кай салом бидҳандат,
Саг пайи луқма меликонад дум.

---

Гарчи ҷайбам тиҳист аз сомон,
Ғам надорам, ки ҳаст сомонам.

---

Шамъ дар пои хеш мечаспад,
Одамӣ дар ҳавоси дунёӣ.

---

Дар алав чӯби хушку тар сӯзад,
Хушки он лек тезтар сӯзад.

---

Сози шеърам баланд месозам,
Менабанданд соз бар шеърам.

---

Кӯр ёбад раҳи худаш, аммо
Кӯрбахт аз куҷо биёбад роҳ.

---

Гарчи бар осмон барояд дуд,
Ҳамчунон рӯсиёҳ хоҳад буд.

---

Ҷорӯб, ки хокрӯба рӯбад,
Ҷояш бикунанд дар паси дар.

---

Дорӣ чу китобу менахонӣ,
Ҷевони китобӣ, эй бародар.

---

Чун бед агар самар надорӣ,
Рав пояи нахли борвар шав.

---

Оташ, ки зи дур поки пок аст,
Андар бағалаш ғами ҳалок аст.

---

Аз шоми сиёҳ тарси ман нест,
Тарсам бувад аз сиёҳрӯӣ.

---

Дар сояи ғуссаву ғами ту
Гаштам чу гиёҳ заъфаронӣ.

---

Нилуфари орзуи васлаш,
Гул кард ба ҳавзи дидаи ман.

---

Суханро ман шакар гуфтам,
Магас аъзои маҳфил шуд.

---

Бубинӣ душманӣ ҳам гоҳ аз дӯст,
Ба тан душман бувад рӯбоҳро пӯст.

---

Агар рӯят набошад оташи тез,
Чаро зулфи сиёҳат тоб хӯрдаст?

---

Зи савдо ҳар касе суде биҷӯяд,
Мани савдоиро савдо зиён аст.

---

На ҳар хандидане меоварад суд,
Бисӯзад хушку тарро хандаи барқ.

---

Ду чашмонат магар дарёст, дарё,
Ки ҳар сӯ мебарад киштии дилро.

---

Шеъре, ки бошад дар сафҳаи рӯз,
Чун соли пешин беэътибор аст.