ЭЛЕОНОРАИ АКВИТАН
(1122-1202)

Маликаи Франция, завҷаи Людовики VII. Баъдтар маликаи Англия.

Басо фараҳафзост, вақте ки зан шоҳ мешавад, агар ду дафъа ба тахт нишинад, ҳоҷат ба орзуи дигар намемонад. Вале, чи тавре ки таърих собит месозад, ягон боигарӣ, ягон тахту тоҷ бо худ ба зан бахт намеорад. Ва, агар мо чӯбдасти салтанат ва аломатҳои замонро ёдовар нашуда, дар хусуси сахтиҳои зиндагии ин бону сухан ронем, хонанда гумон хоҳад кард, ки гап дар хусуси имрӯз меравад, на дар бораи ҳодисаҳои қариб даҳ аср пеш.

Элеонора духтари ягонаи ҳерсог Вилгелми Аквитанӣ буд. Духтаракро аз овони наврасӣ масъалаҳои сиёсию ҳарбӣ ба худ мекашиданд. Ӯ баландболову хушандом буду дар рӯи зин устувор менишаст ва аз камонғӯлак дар дави асп ба нишон бехато тир мезад. Ҳанӯз дар ҷавонӣ ба мулки бонуфузи ҳерсогии Франция соҳиб шуд ва ҳукмронии ӯро сокинони Аквитания бо хушӣ пазируфтанд.

То ба мо ривояти аҷибе аз ҳаёти ин бону расидааст. Мегӯянд, ки ҳанӯз дар айёми 15-солагиаш ба ритсари диловар Ричард дил бохта будааст. Аммо хешовандони мӯътабараш ба ин никоҳ зид мебароянд ва дар яке аз набардҳои кӯчагӣ Ричард дар пеши чашми Элеонора кушта мешавад. Сипас, баъди чанд моҳе ба ӯ домоди обрӯманд, бале худи шоҳ Людовики VII хостгорӣ менамояд.