сӯхт ва хокистари ҳиндузани бузург дар Ҳимолой, шоҳигарии мурдаи барфҳо пош дода шуд. Ҳукумат дар кишвар ба насли сеюми оилаи Нерӯ, писари Индира Роҷив Гандӣ гузашт.

Агар арбоби сиёсӣ аз хамир сохта мешуд, яъне аз овони тифлӣ шахсро барои ҳукумат рондан омода месохтанд, ба ин гуфтаҳо духтари адвокати машҳури Ҳиндустон Ҷавоҳирлаъл Нерӯ мисоли барҷаста буда метавонист. Ҳанӯз то ба дунё омадани духтараш Ҷавоҳирлаъл ба муборизаи зидди англисҳо, баҳри озодии Ҳиндустон камар баст. Ҳаёти ӯ ва тамоми наздикону пайвандонаш ба фаъолияти сиёсати вай тавъам буданд. Завҷааш Камола ёвари содиқ буд.

Мувофиқи анъанаи ҳиндуён зан тифлро дар хонаи модар ба дунё меовард. Аммо оилаи Нерӯ бар хилофи одати ниёгон рафтор кард. Духтарча дар “Маъвои хуррамӣ”, хонаи боҳашамати бобояш, ки дар ҷои муқаддас бино ёфта буд, чашм ба дунёи ҳастӣ кушод ва ба шарафи ватанаш, Индира “Кишвари маҳтобӣ” номида шуд.

Дар ибтидои асри XX худшиносии халқҳои Ҳинд рӯ ба афзоиш ниҳод, нахустин рӯзномаҳои миллӣ ба нашр мерасиданд, ҳизбҳои озодихоҳии демократӣ созмон меёфтанд. Мотилаъл, падари Ҷавоҳирлаъл, президенти Конгресс, иттиҳодияи нави сиёсӣ, интихоб мегардад. “Маъвои хуррамӣ” ба ситоди муборизаи миллӣ табдил меёбад. Индираи хурдакак курсиҳоро дошта роҳ мерафту ибораҳои “инглисҳои мустамликадор”, “санадҳои эътироз”-ро мешунид. Дар дусолагӣ бо “падари миллат”, шахси мӯътабар Маҳатма Гандӣ вохӯрда, аз вай дуо гирифт.