Техника

«ПОЕЗД-ТИР» ДАР КУҶО «МЕПАРАД»?

«Поезд-тир» («Shinkansen») поезди баландсуръат (то 300 км/соат) буда, байни пойтахти Ҷопон – Токио ва шаҳрҳои бузурги мамлакат ҳаракат мекунад. Барои чунин поездҳо роҳи махсус сохта шудааст, ки ҳамгашт надорад. Поезд қатораҳои бисёр дошта, то ҳазор мусофирро ба манзил мерасонад.

ОЁ «РАКЕТА» МЕПАРИД?

«Ракета» — номи локомотиви машҳурест, ки муҳандиси бритониёӣ Ҷорҷ Стефенсон сохтааст. Соли 1829 он дар озмуни паровози беҳтарини роҳи оҳани «Ливерпул — Манчестер» бо суръати 47 км/соат ғолиб омад. Ин ғалаба афзалияти паровозро нисбат ба аспон дар кашидани вагонҳои роҳи оҳан қатъиян ҳал кард.

ПАНҶАРАИ МУҲОФИЗАТКУНАНДА БАРОИ ЧӢ ЛОЗИМ БУД?

Дар роҳҳои оҳани нахустини амрикоӣ ҳайвонот гоҳо ба роҳ мебаромаданд. Поезд дар ҳолати бархӯрд бо онҳо ба садама дучор мешуд. Аз ин сабаб дар паровозҳо панҷара гузошта мешуд, ки ҳайвони бархӯрдаро ба як сӯ мепартофт. Аввалин поезд бо панҷараи муҳофизаткунанда соли 1831 дар Амрико сохта шуда буд.