Мария-хола. Хуб. (Меравад).

З о я. Ман дигар дар ин ҷо истода наметавонам. (Ба Миша-амак) Шумо ҳам зуд аз ин ҷо ба ҷангал равед.

Рейман. Дуруст мегӯед.

Миша-амак. Ба ман ҷин намезанад.

З о я. Акнун якравӣ фоида надорад. Ин ба фоидаи кори умумӣ!

Миша-амак. Аблаҳҳо!

Рейман. Мӯҳтарам Зоя, ман чӣ бояд кунам? Баъд аз ин воқеа аз ман шубҳа карданашон мумкин. Зеро ман гуфта будам, ки назди капитан меравам.

З о я. Шумо?.. Ҳозир... Шумо рафта, аз худи онҳо мепурсед, ки капитан дар куҷо. «Ба фалон ҷо биё гуфт, рафтам, набудааст».

Рейман. Маслиҳати хуб. Вале қофия танг омада монад чӣ мешавад?

Миша-амак. Ба ҷангал.

З о я. Рост мегӯянд. Назди мӯйсафеди якдаста меравед, он тарафашро худаш медонад. Лекин ҳозир ман «бемор», шумо маро бо мошини санитарӣ гусел мекунед.

Рейман. Ба куҷо?

З о я. Баъд мегӯям.

Рейман. Фаҳмида шуд.

З о я. Вай гуфтагиамро фаромӯш накунед. Ба дасти Мария-хола месупоред, ӯ ба ман мерасонад.

Рейман. Дигар шуморо намебинам?

З о я. Гуфта наметавонам.

Рейман. Охир, бе шумо ман кӯри беасо барин шуда мемонам.

З о я. Минбаъд бо мӯйсафеди якдаста кор мебаред. Ӯ зинда бошад, асо ёфт мешавад.

Рейман. Ташаккур.

З о я. Хайр, шумо ба чӣ фикр омадед?

Миша-амак. Ту меравӣ?

З о я. Дигар илоҷ нест, амак.

Миша-амак. Аз Орёл ҳеҷ хабар надорӣ?

З о я. Орёлатон амалиёти зӯр гузаронида, як рота душманро замин газондааст. Фақат ҳаминашро медонам.

Миша-амак (табассум карда). Орёл! (Ба Рейман тамоку таклиф мекунад). Ма, каш!

Рейман. Шумо медонед, ки ман намекашам. Хайр, барои хурсандии шумо мекашам.

Ғалогулиро шунида Зояю Рейман хавотир мешаванд.