3.5.ТУҲФАИ КИТОБИ «ТОҶИКОН»
БА ҲАР ХОНАДОНИ КИШВАР-ИҚДОМИ БЕНАЗИРИ
ПЕШВОИ МИЛЛАТ ВА ТАҲРИКДИҲАНДАИ ЭҲСОСИ
ВАТАНДЎСТӢ ВА ИФТИХОРИ МИЛЛӢ

Душанбе, 24.01.2020/АМИТ «Ховар»/Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, 26 декабри соли 2019, зимни пешниҳоди Паёми навбатӣ ба Маҷлиси Олии Ҷумҳурии Тоҷикистон дар марҳилаи кунунии инкишофи ҷумҳурӣ афзалиятро бештар ба соҳаҳои илму маориф дода, дар бораи омўзиши амиқи таърихи пурифтихори халқи тоҷик ва арҷ гузоштан ба аҷдодони худ дастуру супоришҳо доданд. Дар робита ба ин мавзуъ хабарнигори АМИТ «Ховар» Мавҷуда Анварӣ бо доктори илмҳои таърих, профессор, директори Институти таърих, бостоншиносӣ ва мардумшиносии ба номи Аҳмади Дониши Академияи миллии илмҳои Ҷумҳурии Тоҷикистон Насрулло УБАЙДУЛЛО суҳбат намуд.
АМИТ «Ховар»: Пешвои миллат дар Паёми навбатии хеш ба нақши китобхонаҳо ҳамчун маркази муҳими илму фарҳанг ва омили асосии ҳифзи фарҳанги миллӣ, муҳимтарин воситаи баланд бардоштани сатҳи маърифатнокии сокинон ва пешрафти тафаккуру ҷаҳонбинии онҳо бештар таваҷҷуҳ намуданд. Миллати соҳибфарҳанги мо дар тўли ҳазорсолаҳо дар минтақаҳои гуногуни Мовароуннаҳру Хуросон китобхонаҳои азим бунёд менамуд. Аз он махзани бузург на танҳо аҳли адабу мансаб, балки фақирону дигар қишрҳои ҷомеа низ метавонистанд истифода баранд. Дастури Пешвои миллат ба ҷомеаи кунунӣ доир ба хондани китоби бадеӣ ва ҳифзи асарҳои манзуму мансури адибони гузаштаву муосир ба чӣ хотир аст?