Ба номи Ту дар ин роҳ гом мениҳам.
Оҳ, агар худро бо номи худ аз ёд набарам ва оламро ҳама аз Ту набинаму ба Ту нарасам.

Дарҳои осмон, мегӯянд, имрӯз кушодааст.
Оҳ, маро ба осмону ин дарҳо чӣ кор аст?
Ман дар ду олам мехоҳам танҳо як дар боз бошад ва он дари дили Туст.

Чаро маро ба номи Ӯ савганд медиҳӣ?
Охир он чиро, ки ту гум кардаӣ, дар ин роҳ наёфтаам. Аммо агар Ӯро, ки ба номаш савгандам медиҳӣ, биёбам, бидон, ба шодмонӣ беҳтар аз он чиро, ки гум кардаӣ, медиҳам. Оре, савганд ба номи Ӯ, ки медиҳам. Охир, он чиро, ки гум кардаӣ, медонам, на муҳаббати Ӯст.

Мегӯӣ, меҳрубонтар аз Ӯ касе нест. Оре мегӯям. Ва ту шод мешавӣ, ва ҳам оне, ки Ӯро дар назар дорам. Охир, чӣ гуна меҳрубонтар аз Ӯ касе бошад, ки аз ин як сухан ҳам худро шод намуд, ҳам маро ва ҳам туро?

Мегӯяд, дар хоб ҷамоли худро менамоям. Оҳ, агар ба хоб биравам, номи худро ҳам аз забону хотирам мебарад.

Мани рустоӣ дар ин шаҳр номи Ӯро аз ёд бурдаам. Аммо бовар дорам, бад-ин содадилиҳо маро мебахшад ва ба сӯи худ бо муҳаббат мехонад.

Бирав, гуфтӣ, эй ошиқи бадбахт, бирав. Бирав, гуфтӣ, аммо нагуфтӣ куҷо биравам. Охир, эй Ёр, на ҳама олам мулки туст? Ё барои ин ошиқи бадбахт оламе дигар меофарӣ? Агар