Аз сурате биҷӯ сур, аз нусрате биҷӯ нур,
Рав, ноларо наво кун, Наврӯз медарояд!

Аз модарон дуо гир, уммед аз Худо гир,
Азми раҳи сахо кун, Наврӯз медарояд!

Аз чашми пир нуре, аз рӯйи тифл суре,
Гиру ба сина ҷо кун, Наврӯз медарояд!

Чун чашма азми раҳ кун, бо чашми гул нигаҳ кун,
Рав, сулҳро сало кун, Наврӯз медарояд!

Мурғи қафас раҳо бод, мурғи нафас раҳо бод!
Ғамро зи дил ҷудо кун, Наврӯз медарояд!

Покиза кун дилатро, покиза манзилатро,
Дар сина меҳр ҷо кун, Наврӯз медарояд!

Рав, дарди синаеро ё доғи кинаеро
Бо бӯсае даво кун, Наврӯз медарояд!

Аз гул шукуфтан омӯз, аз сабза гуфтан омӯз,
Арғушт бо сабо кун, Наврӯз медарояд!

НАВРӮЗ

Маънои ману намои ман Наврӯз аст!
Қутби ману раҳнамои ман Наврӯз аст!

Озода зи ғуссаҳову осуда зи ранҷ,
Анвори раҳи раҳои ман Наврӯз аст!

Он махзани пур зи ганҷу симу зари ман,
Мероси ман аз ниёи ман, Наврӯз аст!

Гар зинда ба сад ҳазор захми теғам,
Дасти мададу давои ман Наврӯз аст!

Наврӯз! Биё, ки душманон дӯст шаванд,
Эҳсони Худо, сафои ман Наврӯз аст!