Гулҳои сурхи шукуфону баргҳои сабзи ҳамон ягона бутта вазнин мелағжид.

Дар кафи баргу дили гулбаргҳо, чун марворид, қатраҳои софи борон ҷило медоданд.

Вай намедонист, ки ин буттаро кадоме аз ҳамсояҳо шинондааст; ва кай шинондааст.

Панҷ сол боз дар ҳамин бино зиндагӣ мекунаду намедонад.

Бале...

Инчунин намедонад, ки чӣ тавр аз зану фарзандаш овора гардида, ҳоло, дар айёми пиронсолӣ, чӣ тавр гирифтори ғаму андӯҳ шудааст.

...Қариб ҳар рӯз борон меборид. Баъди борон қариб ҳар рӯз офтоб ё мебаромад, ё не...

Ва ӯ қариб ҳар рӯз аз тирезаи хонаи хурд ва камбағалонааш, ки моломол аз бӯи атрогини гулу гиёҳ мегардид, андешаманд ба берун нигариста, аз он буттаи шукуфон ва тару тозаи садбарг чашм намеканд; дақиқаҳои тӯлонӣ аз баргу гулбаргҳои ҷавон чашм намеканду...

Ба ҳар гуна хаёлҳо мерафт.

Ин ҳолат чандин рӯз давом ёфт.

Пс...

Вай оҳиста-оҳиста буттаи садбарги пушти тирезаро фаромӯш кард.

Хонааш дигар аз нақҳати гулу гиёҳ муаттар намешуд.

Вале сабаби инро намедонист. Ҳатто ба сараш ягон фикр ҳам намеомад. Чунки басо рӯзҳое буданд, ки гӯё дар торикистон мезист; гӯё вақту фазо бароиш ҳаргиз вуҷуд надошт. Ба мағзи дардмандаш хаёлҳои ҳама гарон, ботил ва тарсовар мепечиданд.

Як бегоҳ вай пеши тиреза рафта, онро калон кушод, — дастони лоғар, қадре кабудтоб ва бе-