Дар тӯи ҳосилоти шумо, мутаассифона, бо Иброҳим-ака сӯҳбати муфассал надоштам. Маърака одам бисёр буд. Мо танҳо чанд сухан радду бадал кардему бас.

• Худо хоҳад, имрӯз қусури он рӯзро мебароред, - боз ба шодӣ хандид Темур Шавкат.

• Аммо бояд иқрор кард: Иброҳим-ака дар рафти ҳамон гуфтугӯи кӯтоҳ низ ба ман хеле хуш омад. Инсони хоксор, самими, бар замми ин доно. Ҳатто ба назарам чунин намуд, ки рамзфаҳм аст вай, одамшинос аст.

• Охир, беҳуда профессор не лақабаш!

• Дар ин бора хондам.

• Аз куҷо? — ба такрор ҳайрон шуд Темур Шавкат.

• Дар як китоб ба номи «Фидоиёни истиқлолият», - гуфтам ман бо табассум. - Муҳаррираш худатон. Дар ҳамин Деҳнав ба табъ расидааст.

• О вай се рӯз пеш аз чоп баромаду... Шумо аллакай ёфтед? Ва ҳатто хондед?

• Касе ки аз сидқи дил меҷӯяд, ҳатман меёбад.

• Офарин-э! - пиёлаи чойро ба даст гирифт Темур Шавкат.

Банда хоби шаб дидаамро аз нав ба хотир оварда, пас аз қадре сукут хаёлманд гуфтам:

• Вале рафтани ман ба гумон...

• Куҷо? - аввал нафаҳмид ӯ.

• Ҳамроҳи шумо, ба дидори Иброҳим-ака...

• Сабаб? - баъд бештар гаранг монд ӯ.

• Баргаштаниам. Дилам камтар нотинч... Боз ин ки, Душанберо пазмон шудаам.

• Балки аз хона хавотиред?

• Чандон не. Худам... Аз чӣ бошад, ҳар хел хобҳои парешон мебинам.