Агар пурсанд, ки чарх чаро бояд зад ва чӣ маънӣ дорад?

Байт:

Дил чу паргор ба ҳар сӯ даваронӣ мекард,
В-андар он доира саргаштаи по барҷо буд.

Ё:

Ҳамчу паргор зи саргаштагиаш боке нест,
Ҳар кӣ дар доираи ишқи ту собитқадам аст.

Агар пурсанд, ки имони хирқа чист, бигӯй, сатторӣ (пӯшида).

Агар пурсанд, ки эҳсони хирқа чист, бигӯй, росткорӣ.

Агар пурсанд, ки шариати хирқа чист, бигӯй, парҳезкорӣ.

Агар пурсанд, ки тариқати хирқа чист, бигӯй, амонатдорӣ.

Агар пурсанд, ки ҳақиқати хирқа чист, бигӯй, аз ғайр бегона будан.

Агар пурсанд, ки сирри хирқа чист, бигӯй, иродати тамом.

Агар пурсанд, ки ҷони хирқа чист, бигӯй, муҳаббати бардавом.

Агар пурсанд, ки фазилати хирқа чист, бигӯй, тарки ҳаво.

Агар пурсанд, ки фарзи хирқа чист, бигӯй, сӯҳбати пирон.

Агар пурсанд, ки суннати хирқа чист, бигӯй, хидмати мардон.

Агар пурсанд, ки калиди хирқа чист, бигӯй, такбир ва таҳлил.

Агар пурсанд, ки гиребони хирқа чист, бигӯй, роз нигоҳ доштан.

Агар пурсанд, ки остини хирқа чист, бигӯй, дасткӯтоҳ будан.

Агар пурсанд, ки домани хирқа чист, бигӯй, аз сари гуноҳи хасм даргузаштан.

Агар пурсанд, ки беруни хирқа чист, бигӯй, нуру сурур.

Агар пурсанд, ки даруни хирқа чист, бигӯй, сабр.
Агар пурсанд, ки тани хирқа чист, бигӯй, вафо.
Агар пурсанд, ки дили хирқа чист, бигӯй, шукру сидқ.

Агар пурсанд, ки осмони хирқа чист, бигӯй, дасти пир.

Агар пурсанд, ки замини хирқа чист, бигӯй, тани фақир.

Агар пурсанд, ки нақди хирқа чист, бигӯй, одобу ҳурмат.

Агар пурсанд, ки номи хирқа чист, бигӯй, ҳаё.
Агар пурсанд, ки коми хирқа чист, бигӯй, хушнудӣ.
Агар пурсанд, ки асри хирқа чист, бигӯй, бад нодида кардан.

Агар пурсанд, ки ғусли хирқа чист, бигӯй, тарк.
Агар пурсанд, ки намози хирқа чист, бигӯй, покӣ.
Агар пурсанд, ки ямини хирқа чист, бигӯй, таваккал.

Агар пурсанд, ки ясори хирқа чист, бигӯй, суботу тамкин.

Агар пурсанд, ки қиблаи хирқа чист, бигӯй, пири комил.

Агар пурсанд, ки камоли хирқа чист, бигӯй, ақидаи пок.

Агар пурсанд, ки аҳкоми хирқа чанд аст, бигӯй, шаш: Аввал, тавба; дуюм, сахо; сеюм, қаноат; чорум, ризо; панҷум, риёзат; шашум, ҳадди миёни хавфу риҷо.