ХУСУСИЯТҲОИ ПСИХОЛОГИИ ТАРАҚҚИЁТ ДАР ДАВРАИ СИННИ КӮДАКӢ ВА ИБТИДОИ БАЧАГӢ
Давраи кӯдакӣ соли аввали ҳаёти кӯдак ва синни ибтидоии бачагӣ аз 1 то 3-соларо дар бар мегирад.
Дар давраи кӯдакӣ синни навзодиро ҳамчун давраи алоҳидаи ҳаёт ҷудо мекунанд, ки дар он ба намуди тоза зуҳуроти шаклҳои модарзодӣ ва инстинктивии рафторро мушоҳида кардан мумкин аст. Шаклҳои рафтори инстинктивӣ ба қонеъ намудани талаботҳои органикӣ равона шудаанд ва бояд гуфт, ки қонеъгардии онҳо асоси тараққиёти психикиро ташкил надода, балки зинда мондани кӯдакро таъмин мекунад. Таваллуд барои организми кӯдак як навъ шикасти калон аст, чунки муҳити зиндагии ӯ тез дигар шуда, алоқаҳо бо организми модар канда мешаванд, яъне ҳаёти мустақилона шурӯъ мешавад.
Рефлексҳои ғайришартии кӯдак бар хилофи бачаи ҳайвон зоҳиршавии шаклҳои рафтори одамро таъмин намекунанд. Дар байни рефлексҳои ғайришартӣ рефлексҳои атавистӣ (рефлекси дошта гирифтан, рефлекси хазидан) мавҷуданд, ки онҳо то охири давраи навзодӣ хомӯш мегарданд. Онҳо асоси тараққиёти психикӣ намебошанд.
Хусусияти асосии навзодро имкониятҳои беҳудуди азхуднамоии таҷрибаи нав, ҳосил намудани шаклҳои ба одам хоси рафтор, инкишофи талаботҳои нав (ба таассурот гирифтан, дар ҳаракат, дар муошират бо калонсолон) дар бар мегирад, ки дар асоси маҳз онҳо тараққиёти психикӣ ба амал меояд.
Тараққиёти қувваи биниш ва шунавоӣ дар навзод нисбат ба тараққиёти ҳаракатҳои ҷисмонӣ, ки махсус бо парпеч кардани кӯдак маҳдуд мешаванд, тезтар ба вуҷуд меояд.