– Намемонем. Дар ин ҷо ба ҷуз шаъни милисаро пос доштан, мо боз бояд шаъни нақлиёти ватаниро низ ҳимоя намоем.
“Жигули” акнун моли ватани мо нест, - эътироз кард Абдурашиди Шариф.
– Замоне мо аз як ватани бузург будем ва ин айби мо нест, ки бархе аз худобехабарон теша бар решаи хеш заданд.

• Об агар сад пора гардад боз бо ҳам ошност. Ҳамин хел шуморо фаҳмем?
  – Дуруст.
  – “Мерсӣ” ба тарафи рост тоб хўрд, - ронандаро огоҳ кард таҷрибаомўз.
  – Дида истодаам, - гўён дар сари гардиш ронанда суръатро каме суст кард.
  Чун мошини «ВАЗ 2109» «Мерседес 600» - ро дар масофаи муайян мавриди назорати хеш қарор дод, ронанда гуфт:
  – Ба фикрам, Лайлиҷон ба амалиёти охирин баромад.
  –Чӣ хел ба амалиёти охирин?
  – Кулли мардуми мо нисбати сиёҳпӯшон ҳамдарданд, бехабар аз он ки бархе аз онҳо либоси мотамро ба дигар мақсад мепўшанд.
  – Чӣ хел ба дигар мақсад?
  – Ҳоло ман чизе гуфта наметавонам, вале фардо субҳ худат аз рафтори Лайлӣ Анваровна ангушти ҳайрат хоҳӣ газид.
  – Мошин ба тарафи чап мегардад.
  – Боке нест, ин дафъа мо ҳарду дар як қаторем, - гўён ронанда чароғаки огоҳкунандаи тарафи чапро ба кор даровард.
  – Аҷиб, дар ин шом ў ба куҷо мерафта бошад?
  – Аввал ба кўчаи Фирдавсӣ, сипас ба Гулобод, - хулоса кард Музаффари Сафар.
  – Шояд онҳоро огоҳ намоем?
  – Лозим нест. Ҳама шахсони дар дидбонгоҳ буда бояд ҳушёриро аз даст надиҳанд.
  – То Гулобод ҳам Лайлиҷонро гусел мекунем?
  – Намедонам, вале бе рухсати Марказ мо худсарона ин корро карда наметавонем.