– Ман онро ба ягон ҷо пешниҳод намекунам.
– Ихтиёратон. Чун ҷеғ задем, ҳатман биёед!
– Ҳоло ба куҷо равам?
– Ба хона ё ба сари рама. Умуман, ба куҷое дилатон хоҳад.
Самандари Раҳим дигар чизе нагуфта, аз утоқи кории ваколатдори кофтукови ҷиноятӣ баромад.
– Рафиқ капитан, бо чунинҳояш…
– Ҳеҷ гап не, милиса ба чунин хабаркашҳо ҳам эҳтиёҷ надорад. Агар ў дар вақташ нишондоди рўйростро аз хабаркашӣ фарқ мекард, ҳаргиз дар маҳбас наменишаст. Ба ҳар ҳол ў мардона сухани хеш гуфт ва эҳтироми банда нисбаташ дучанд шуд. Мо бе ў ҳам сояро аз болояш дур хоҳем кард, то бидонад милиса кист.
– Баъди ҳамин суханҳои қаланфурмонандаш?
– Албатта. Охир ин вазифаи ҷонии мост.
Гурезов боз чизе гуфтан мехост, вале занги телефони дохилӣ садо дод ва ваколатдори кофтукови ҷиноятӣ гўшакро ба дасти Сорбони Ҳомид дода оҳиста гуфт:
-Аз ноҳияи Марказӣ шуморо мепурсанд, рафиқ капитан…

---

Утоқи кории Ҳамид Ҷовид дар ин нисфи шаб саҳнаи театрро мемонд. Дар сари мизи корӣ Ҳамид Ҷовид чун актёри саҳна сухан мегуфт ва бинанда гумон мекард, ки ў бо худ не, бо тамошобинон гуфтугў дорад. Ягона чароғаки рўимизӣ, ки ранги нофармон дошт, ба тарафи саҳна нигаронида шуда буд ва «аҳли толор» дар нимторикӣ менишастанд.
– Ба фикри шумо, ба зери назорат гирифтани мавзеи Хушкакдара ягон натиҷа медиҳад? - пурсид шахсе, ки чароғаки саҳна ба сўяш нигаронида шуда буд.
– Намедонам. Модоме ки худи ҳамин мавзеъ мавриди омўзиши мо қарор гирифтааст, месазад нисбат ба ҳолатҳои кор дурусттар андеша намоем, - овоз омад аз толор.
– Дар масъалаи хабари телефонии Олег Ефремович чӣ чора андешем?
– Аз он чӣ ки мардуми маҳали зисти Хоҷаева расми Солеҳ Ҷалилро шинохтанд ва гуфтаанд, ки бо Хоҷаева муносибати маҳрамана доштааст, хуб мешуд, ки аз қафои Хоҷаева назоратро ба роҳ монем.