Боди субҳгоҳӣ ногаҳон чун тираабре дар осмони хаёлоти Ҳамид Ҷовид падид омад.

• Ёсуманро аз ёд баровардаем.
• Худаш чӣ гап, рафиқ полковник? - сухани вайро шунида пурсид сардори бахши кофтукови ҷиноятӣ.
• Ёсуманро аз ёд баровардаем, рафту киллерро ба муқобили вай равона намуда бошанд - чӣ?
• Ёсуман ду рўз боз дар зери назорати доимист. Бачаҳо ўро аз кўчаи Сурхоб то кўчаи Анзоб ва баръакс гусел мекунанд.
• Фаромўш насозед, рафиқ подполковник, ки ба ин кор киллер сафарбар карда шудааст ва ў ҳам марди аноӣ набудагист.
  Шаби торику сангистону ман маст, Қадаҳ аз дасти ман афтоду нашкаст.
  Нигоҳдорандааш неку нигоҳ дошт, Вагарна сад қадаҳ нафтода бишкаст...
• Ман қоил, вале мо набояд ҳушёриро аз даст диҳем.
• Даст ба дуо мебардорем, ки то субҳ ба Ёсуман ҳодисае рух надиҳад, чун рўз шавад ягон фикр мекунем.
• Омин!
  Ситораҳо оҳиста - оҳиста ҷилои хеш аз даст медоданд...
• Ҳеҷ чиз дар дунё абадӣ нест.
• Чиро дар назар доред, рафиқ полковник?
• Соате пештар ситораҳо чӣ хел ҷило доштанд ва акнун бубин...
• Кош ҳамин ҳолатро ҷинояткорон мефаҳмиданд.
  Барои айшу нўши дурўза онҳо ба чӣ корҳое даст намезананд, бехабар аз он ки...
• Рафтанду равему боз оянду раванд.
• Суханони Хайём ҳама дурдонаанд.
• Бале, дурдона, акнун рафтем!
• Ба куҷо?
• Ба идора...
  Даъвати навбатии Марказ ба алоқа бо бонги хурӯси ҳамсоя, ки дар шафти бинои милиса ҷойгир буд, рост омад.
  Дуюм марказро ҳушдор сохт, ки объект ба кўча баромада, аз телефон - автомат ба куҷое занг зад.