• Чӣ илоҷ, модоме ки намояндаи прокуратура худро аз ҷустуҷўи Ёсуман барканор гирифтанист…
• Дар ин солҳо бандаро агар дастоварде ҳам насиб гашта бошад, ин танҳо ҳуҷҷатгузорист. Дар корҳои ҷустуҷўӣ бошад, хайр худатон медонед, рафиқ капитан…
• Аз куҷо донам.
• Дар корҳои ҷустуҷўи бошад, банда бум - бум, - ангушти ишоратиашро дар сараш тоб дода гуфт муфаттиш.
• Хоксорӣ мекунед?
• Не, ба ростӣ мегўям. Дар дунё ҳар кас бояд ҳамон кореро ба анҷом расонад, ки аз он манфиате баҳри ҷамъият ҳаст.
• Нуқтаи назари шефат чӣ хел?
• Намедонам. Ҳа, воқеъан, як рўз ман аз болои худат ба шеф шикоят намудам. Ба ростӣ, ман шикоят намуданро ҳам бад мебинам, вале чун фаҳмидам, ки шумо бандаро назаратон нагирифт…
• Боке нест.
• Чиро дар назар доред?
• Шикоят танҳо аз болои нафаре мекунанд, ки аз вай манфиатеро ҷўёянд. Аз болои симчўб ё дарахти бесамар то кунун касе шикоят набурдааст.
• Ба хунсардии шумо ман қоил, рафиқ капитан.
• Акнун рухсат диҳед аз пайи супоришатон шавам.
• Шояд як пиёла чой…
• Маротибаи дигар, - гўён Сорбони Ҳомид бо муфаттиш худоҳофизӣ намуд.
• Ёсуман аҷаб номи зебое. Наход зан бо чунин номи зебо ин қадар хунсард шавад?
  Тамоми роҳ ваколатдори кофтукови ҷиноятӣ андешаи онро намуд, ки оё ўро шиносе бо ҳамин ном ҳаст ё не? То ба милиса расиду ба саволи хеш ҷавобе наёфт.
• Акнун Ёсумани аслиро пайдо намудан лозим ва маҳз ҳамин Ёсуман шиноси аввалини ман хоҳад шуд, - зери лаб гуфт вай ва по ба остонаи коргоҳ гузошт…

---

Хун ҳамеша ба тарафи хун такя мекунад, на ба тарафи устухон. Ҳарчанд Шамси Солеҳ кайҳо боз бо тағояш