Баробари ба даромадгоҳ ворид шудан лаҳзае сукут кард ва ба қафо нигарист. Чун ҳама ҷоро сокиту ором дид, ба дохили бино рафта, рў ба рўйи хонаи рақами 3 бозистод ва тугмачаи зангро зер кард.
Дарро ба рўяш ҷавонзани қадпасти бисту се - бисту шашсола, кушод, ки дар тан куртаи пахтагини рангаш гулобӣ дошт. Хатҳои чун алаф рости курта қади пасти ўро аз будаш баландтар нишон медод.

• Капитани милиса Сорбони Ҳомид, - аз ҷайбаш шаҳодатномаи хизматиашро бароварда ба дасти соҳибхона доданӣ шуд ӯ.
• Лозим нест.
• Ман тариқи телефон…
• Ҳа, дадои Шерзод шуморо интизор,-гўён соҳибхона баъди ворид шудани вай ба хона дарро маҳкам карда, барои даромаданаш дари мобайнро нишон дод.
  Баробари вориди меҳмонхона шудан ў марди тахминан си - сиюпанҷсолаеро дид, ки болои курсии мулоим нишастааст.
• Марҳамат гузаред, - овоз рӯшан кард он мард ва ба хотири меҳмон базӯр бархест.
• Илтимос нахезед, - гуфт меҳмон ва ба курсии рў ба рўйи соҳибхона нишаст.
• Ин кас Сорбони Ҳомид, - меҳмонро муаррифӣ намуд ҳамсари соҳибхона, ки аз пеши дари даромадгоҳ ўро истиқбол гирифта буд.
• Бисёр хуб, банда падари Шерзод.
• Шумо суҳбат намоед, ман як чой биёрам, - гўён зан интизори тасдиқ ва ё инкори сухани хеш нашуда, аз дар баромад.
• Ба фикрам, шуморо ҳам онҳо ба чунин аҳвол расонидаанд, - аввалин шуда риштаи суханро ба даст гирифта пурсид Сорбони Ҳомид.
• Чӣ гўям? - каме ҳам бошад дасту по хўрда гуфт соҳибхона.