Дар таҳқиқу баррасии аҳволу осори Рўдакӣ марказҳои илмии Тоҷикистон - Институти забон ва адабиёти ба номи Рўдакӣ, кафедраи таърихи адабиёти Донишгоҳи давлатии миллии Тоҷикистон, Институти таърихи АИ ҶТ, кафедраи таърихи адабиёти донишгоҳҳои омўзгорӣ бештар фаъолият зоҳир менамоянд. Боиси хушнудист, ки ахиран маркази нави ғайридавлатии Бунёди Рўдакӣ, ки бо ташаббси устод Р.Ҳодизода таъсис гардид, дар ин замина ба фаъолият шурўъ намудааст ва умед аст, ки он дар рўдакишиносӣ саҳми арзанда хоҳад гузошт.