Яке паҳлавоне ба пеш-андарун,
Ки солаш зи ду ҳафт н-омад фузун,

Ба боло зи сарви сиҳӣ бартар аст,
Чу Хуршеди тобон бад-ӯ пайкар аст,

Бараш чун бари шеру болош бурз,
Ба Эрон надидам чунин дасту гурз.

Чу шамшери ҳиндӣ ба чанг оядаш,
Зи дарёву аз кӯҳ нанг оядаш,

Чу овози ӯ раъди ғурранда нест,
Чу бозӯи ӯ теғи бурранда нест,

Ба Эрону Тӯрон чун ӯ мард нест,
Зи гурдон кас ӯро ҳамовард нест!

Ба ном аст Суҳроб гурди далер,
На аз дев печад, на аз пилу шер,

Ту гӯӣ, магар бегумон Рустам аст
Ва ё гурде аз тухмаи Найрам аст!

Ҳаҷири диловар миёнро бибаст,
1
Яке бораи тезтак-бар нишаст,

Бишуд пеши Суҳроб размозмой,
Бар аспаш надидам фузун з-он ба пой,

Ки барҳам занад мижжаро ҷангҷӯй,
Гирояд зи бинӣ суи мағз бӯй,

Ки Суҳробаш аз пушти зин баргирифт,
Бараш монда з-он бозу андар шигифт,

Дуруст асту акнун ба зинҳори ӯст,
Пурозор ҷону пур аз дард пӯст.

Саворони туркон басе дидаам,
Инонпеч аз ин гуна нашнидаам,

Набошад ба гетӣ чу ӯ размсоз,
Магар пилтан гурди гарданфароз.

Ҳамоварди ӯ дар ҷаҳон сар ба сар
Набошад ба ҷуз Рустами Золи Зар!

Бораи тезтак-бар – ба аспи бодпо, ба аспи даванд.