Дили ойинабанд

---

Ҳама рӯзи сиёҳам буд бе ту,
Ҳама ҳоли табоҳам буд бе ту.

Куҷо будӣ, аё хуршедмаҳтоб,
Ки сад шому пагоҳам буд бе ту.

Биёӣ, ё наойӣ фасли сармо,
Баҳору тирамоҳам буд бе ту.

Намозам нима андар доманат монд,
Ҳама ҷурму гуноҳам буд бе ту.

Намондам як қадам то шод монӣ,
Агарчанде ки роҳам буд бе ту.

Ба рӯйи ин ҷаҳону рӯзгорон
Замоне як нигоҳам буд бе ту.

---

Ёри равоншинос, равони маро шинос,
Ё ин ки хуб шеъри равони маро шинос.

Ғайр аз ҳавои шоирию ошиқӣ надошт,
Тақвимро гузору замони маро шинос.

Рози маро зи мардуми чашмони ман шунав,
Дарди ниҳону доғи аёни маро шинос.

Як раҳ қадам бимон ба ҷаҳони ҷавониям,
То дориям ҷавон, ту ҷаҳони маро шинос.

Ҷонсӯзтар зи оташу дилпоктар зи об,
Суду зиёни як дилу ҷони маро шинос.

Дар чашми меҳрбори ту дидам, ки зиндаам,
Ин зиндагии сахту гарони маро шинос.