Фаромӯш мекарданд даме, ки ба ҳамдигар баста мешуданд ва майле доштанд ба ҳамдигар онҳо…

---

Борон мерехт ва шаҳристон меистод ҳанӯз зери он.
Балки ҳам борон буду ҳам аз баъзе роғакҳои абр сар зада буд дастаҳои партави хуршед.
Қатраборону нурборон ба ҳам омезиш доштанд бо як тарзи мӯъҷизаборе.

---

…Баъд мерафт Неъмат дар кӯчаҳои шаҳристон. Мерафт, аҷиб, ки танҳо. Намебурд бо худаш Лоҷувардро. Ва ҳатто бо Неъмат набуд писараки вай. Писараш, ки дигар дар поёни занапоя наметофт.
Мерафт лангон, калавида, такон хӯрда Неъмат. Шатта хӯрда ва лабаш кафидаву пайи хун дошт. Ва ҳар гоҳ ба замин туф мекард шояд аз ин боис. Вале мерафт танҳо, зери борон. Мерафт лангон ва беҳол. Вай шатта хӯрда буд аз Ромиш ва ё худашро зада буд ба дари нимшикан ва чунин зарбу захм бардошта буд, маълум набуд ва касе ин ҷиҳати масъаларо намедонист.
…Шамоле, ки амсоли ҳаво шӯриш дошт, ногаҳ як порча қоғазро аз равзанае рабуда, бардошта, тоб дода, дар осмон чанд бор пасту боло бурда, пасон боз поён кард ва тоб дода, пеши пои яке фаровард дар ниҳояти ниҳоят…
Балки пеши пойи Неъмат фароварда буд қоғазро шамоли печон.
Аҷиб, ки сурати худи Неъмат буд, балки сурати навҷавонии худи вай буд. Балки ҳамон сурате буд, ки аз сурати сегона ҷудо шуда, ба панҷаи шамол супорида шуда буд ва шамол баъди бозӣ доронидан ва тоб доданҳо афтонда буд онро пеши пойи худи Неъмат.
Менигарист ба сурати пеши пойи худаш-ба навҷавонии худаш-Неъмат, ҳарчанд сину солаш аз навҷавонӣ дур шуда буд ва дар атроф меистод туфону шӯриши муҳит ва абр мегирист, раъд ғулғула мезад, барқ мерахшид...
Барои чӣ мегирист абр ҳанӯз? Ва барои кӣ мегирист меғҳои осмонӣ беист?
Ва чаро дастаҳои анвор ҳам сар задаанд аз чокҳои кучаки меғҳо? Ва чаро онҳо чунин поканду хушҳолу умедбахшо?
Чаро, ки?…

---

Рӯи ду сурати ду нафари як вақтҳо аз ҳам дарондаву ҷудокарда, ки боз бо кадом шилму қоғаз, бо тарзи бачагона часпонида шуда буд, муғчагуле пайдо гардид. Балки дар пояи сурати ба ҳам часпонидаи Лоҷувард ва Ромиш пайдо гардида буд муғчагули танҳо.
Ин ҳозир буд ва ё баъд…
…маълум набуд.
Балки вақт акнун аҳмият надошт дигар…
Магар ҳама воқеа ба охир расида буд баъди ҳар чизи шуда ва ё оғози дигаре гирифта буд аз сари нав воқеаҳои пурпечи зиндагӣ?…
Инро ҳам касе дигар намедонист ва ҳоло пешгӯӣ карда наметавонист…