САРИ РАВОН

Як шом дидам

Бар тори девор:

Як сар равон аст

Дар тори девор.

Ин сар набошад,

Пас чист дигар?

Ин сар, ки бошад,

Аз кист ин сар?

Ман хоб бошам?

Ё ин ки бедор?

Чашмони худро

Молам ба такрор.

Бинам дубора

Бар тори девор:

Як сар равон аст

Дар тори девор!

Сар пушти девор

Ногаҳ ниҳон гашт…

Дарвоза во кард,

Ин сӯй бигзашт.

Эй вой, акнун

Ояд ба сӯям!

Оё гурезам?

Ё дод гӯям?

Дар раҳ кашид ӯ

Ногаҳ тамоку…

– Бобои Хуршед?

О, ин Шумо-ку!!!

АЗОБИ ХУРД БУДАН

Ҳар як калон,

Охир, чаро

Танбеҳаке

Бидҳад маро?!

– Инро нарас!

– Онро набин!

– Ин ҷо наё!

– Он ҷо нашин!

– Инро набур!

– Онро нарез!

– Ин хел хоб!

– Он хел хез!

– Ин– айби ту!

– Э, ҳайфи ту!

Дору мадор!

Гӯву магӯ!..

Вай-вай, басо

Хурдӣ бад аст! –

Хурдӣ маро

Дар дил задаст!

ПОПӮШИ МОМО

Дар ошхона

Мавлуда афтид,

Дар остона

Мавлуда афтид.

Озор дида

Банди ду дасташ,

Ҳар сӯ парида

Қанди ду дасташ,

Мехезад аз ҷой,

Мемонад ӯ пой,

Меафтад ӯ, ҳой!

Эй вой, эй вой…

Ҳарчанд кӯшад,

Меафтад аз по,

Ҳар кас, ки пӯшад

Попӯши момо.