Расулхон Ҳодизода бо ҳамроҳии хонумашон ба ин базм ташриф овардаву бо ранҷа намудани қудуми муборакашон ба хурсандии хонадони мо боз шукӯҳу шодии зиёдеро зам сохтаву меҳмони азизу арҷманди мо шуда буданд. Он рӯз устод хонадони моро ба ин хурсанди табрик гуфта ва ҳамзамон падари бузургворамро оғӯш кашида фармуданд, ки «камина бо Ҳоҷӣ Саййидолим ҳамсол ҳастем. Ва ман агар аз ибтидо медонистам, ки Ҳамзаҷон чунин падари шоиру табиб ва донишманду маорифпарвар доранд, маҷбур мекардам, ки роҷеъ ба рӯзгору осори эшон рисолаи илмӣ нависанд».

Устод Расулхон Ҳодизода дар вафову дӯстӣ низ беназир буданд ва ҳамеша кӯшиш менамуданд, ки ин суннати наҷиби инсониро поку беолоиш нигоҳ доранду барои мо шогирдонашон намунаи ибрат бошанд. Ҳар нафаре, ки бо устод бори нахуст вохӯрдаву мулоқот менамуд аз салобату шукӯҳи домулло зуд дасту по хӯрда ҳарфҳои дилаш канда-кандаву пареш-пареш баён мешуд. Вале дар баробари сахтгирӣ, инчунин дар замири устод самимияту меҳр беандоза нуҳуфта буд...

Бо гузашти айём набудани эшон бармало эҳсос мегардад, мақом ва ҷойгоҳи устод Расулхон Ҳодизода дар корзори илму адаби тоҷик ҳамчун як чеҳраи мондагор барои ҳамешагӣ холии аст:

Домони муборакат буд орӣ
З-олудагии ҷаҳони фонӣ!