ҶУЛИК

Як ҷонвари хабаркаш

Ҷулик будаст номаш.

Ҷояш биёбон будаст,

Дар дашту майдон будаст.

Бо нолаю бо фиғон,

Баромадаст ба осмон.

Ба Симурғи паҳлавон

Хабаркашӣ мекардаст,

Гапфурўшӣ мекардаст.

Шикоятҳояш бисёр:

Аз ёру хешу табор,

Аз Одаму аз Ҳавво,

Аз кўдаки бегуноҳ,

Аз тамоми парранда,

Аз тамоми чарранда,

Мегуфтаст, ки

–Гунҷишкак,

Беақлӣ дорад андак.

Чириқ-чириқ мекунад,

Мардумро зиқ мекунад.

Уштур каҷу килеб аст,

Лабаш андак безеб аст.

Мўрчаҳо бор мекашанд,

Фақат дар ғами хешанд.

Маҷнунбед саркашол аст,

Сади роҳи шамол аст.

Зоғон қар-қар мекунанд,

Гўшамро кар мекунанд.

Уқоб – вазири Симурғ,

Шунид ин ҳама дурўғ.

Ҳамаро ба шоҳ фаҳмонд,

Ҷуликро з-он ҷо биронд,

Он Ҷулики хабаркаш

Дар ҳаво бо шўру ғаш

Гоҳ меистад муаллақ,

Доду вояш дар фалак.

Мудом аз мардум ҷудо,

Ҷулулу дорад ҳоло.

Хабаркашро одамон

Ана аз ҳамон замон,

«Дилаш торик» – мегўянд,

Будаст Ҷулик мегўянд.

МОМОҶУРҒОТАК

Момоҷурғотак,

Ҷурғоти ту ку?

Омадӣ аз кўҳ,

Савғоти ту ку?

Момоҷурғотак,

Ҷонвари зебо

Як коса ҷурғот

Медиҳӣ бар мо?

– Аз ҷурғоти нав

Дўғ кашам ман,

Аз дўғи ширин

Мегирам равған.

Равғани маска–

Доруву дармон.

Фатиру маска–

Ҳаловати ҷон.